వికెట్ పడగానే వినూత్న రీతిలో సంబరాలు చేసుకుంటాడు టీమ్ఇండియా యువ బౌలర్ మహ్మద్ సిరాజ్. నోరు మూసుకోండి అని అర్థం వచ్చేలా.. మూతిపై వేలు చూపిస్తుంటాడు. దీనిపై విమర్శలు వచ్చినప్పటికీ అతను ఆ స్టైల్ను మాత్రం మార్చలేదు. అయితే తనను తక్కువ చేసి మాట్లాడే వారికి సమాధానంగానే ఈ విధంగా సంజ్ఞలు చేస్తున్నట్లు సిరాజ్ వివరణ ఇచ్చాడు. ఇప్పుడు ఇదే స్టైల్లో భారీ కటౌట్ను ఏర్పాటు చేశారు హైదరాబాద్ అభిమానులు. మూడు అంతస్తుల ఎత్తులో రోడ్డు మధ్యలో అమర్చారు. మహ్మద్ సిరాజ్.. హైదరాబాద్ రజనీకాంత్ అంటూ అతడిపై ప్రశంసలు కురిపిస్తున్నారు ఫ్యాన్స్.
సిరాజ్.. హైదరాబాద్ రజనీకాంత్- భారీ కటౌట్ ఏర్పాటు
వికెట్ పడగానే మూతిపై వేలు పెట్టి కొత్త సంజ్ఞలతో సంబరాలు చేసుకునే హైదరాబాద్ బౌలర్ మహ్మద్ సిరాజ్పై అభిమానాన్ని చాటుకున్నారు ఫ్యాన్స్. ఇప్పుడదే చిత్రంతో భారీ కటౌట్ను ఏర్పాటు చేసిన అతడి మద్దతుదారులు.. సిరాజ్.. హైదరాబాద్ రజనీకాంత్ అంటూ ప్రశంసిస్తున్నారు.
మహ్మద్ సిరాజ్
మహ్మద్ సిరాజ్.. ఇటీవల కాలంలో టీమ్ఇండియాలో ఎక్కువగా వినిపిస్తున్న పేరు. ఈ ఏడాది ఆరంభంలో టెస్టుల్లో అరంగేట్రం చేసిన ఈ హైదరాబాదీ.. అనతి కాలంలోనే జట్టులో కీలక బౌలర్గా మారాడు. గబ్బాలో ఆసీస్పై 5 వికెట్లతో మెరిసి బోర్డర్-గావస్కర్ ట్రోఫీ విజయంలో తనదైన పాత్ర పోషించాడు. తాజాగా లార్డ్స్ వేదికగా ఇంగ్లాండ్తో జరిగిన టెస్టులో 8 వికెట్లతో మరోసారి ప్రత్యర్థి పతనాన్ని శాసించాడు. తొలి టెస్టులో 3 వికెట్లతో పాటు మొత్తంగా 11 వికెట్లు తీశాడు.