టీమ్ఇండియా కెప్టెన్ విరాట్ కోహ్లీ ఇన్స్టా వేదికగా అభిమానులతో సరదాగా గడిపాడు. వారు అడిగిన ప్రశ్నలకు సమాధానం చెప్పాడు.
తన కూతురు 'వామిక' ఫొటోను చూపించాలని.. ఆ పేరుకు అర్థమేంటో చెప్పాలని ఓ అభిమాని కోరాడు. "వామిక అనేది దుర్గా దేవికి మరో పేరు. అనుష్క, నేను.. మా కూతురు ఫొటోను సామాజిక మాధ్యమాల్లో పెట్టొద్దని నిర్ణయించుకున్నాం. సామాజిక మాధ్యమాలు అంటే ఏంటో వామికకు తెలిసేంత వరకు అలాగే ఉండాలనుకున్నాం. ఆ తర్వాత ఆమె ఇష్టం" అని కోహ్లీ సమాధానంగా చెప్పాడు.
క్వారంటైన్లో ప్రాక్టీస్ ఎలా గడుస్తుందని మరో అభిమాని కోహ్లీని ప్రశ్నించగా.. "రోజుకు ఒకసారి ట్రైనింగ్లో పాల్గొంటున్నా. మిగిలిన సమయాన్ని కుటుంబంతో గడుపుతున్నా" అని తెలిపాడు.
తనపై నెట్టింట వచ్చే మీమ్స్, ట్రోల్స్పై ఎలా సమాధానం చెప్తావని ఇంకో అభిమాని విరాట్ను అడిగాడు. దీనికి తన బ్యాటే మాట్లాడుతుందంటూ అర్థం వచ్చేలా ఉన్న ఫొటోను పంచుకున్నాడు కోహ్లీ. ఓ అభిమాని కోరిక మేరకు తన చిన్ననాటి ఫొటోను కూడా పంచుకున్నాడు టీమ్ఇండియా కెప్టెన్.
ఇదీ చదవండి:శ్రీలంక బోర్డు వివాదం: క్రికెటర్లపై డిసిల్వా ఘాటు విమర్శలు
