ప్రపంచకప్పే నాకు చివరిది...

వన్డేలకు దూరమైనా.. టీ 20 క్రికెట్​లో కొనసాగుతానని దక్షిణాఫ్రికా స్పిన్నర్ ఇమ్రాన్ తాహిర్ ప్రకటించాడు.

దక్షిణాఫ్రికా లెగ్​స్పిన్నర్​ ఇమ్రాన్ తాహిర్ అంతర్జాతీయ వన్డేల నుంచి తప్పుకోనున్నాడు. వచ్చే ప్రపంచకప్ అనంతరం ఈ ఫార్మాట్ నుంచి దూరమవుతున్నట్టు ప్రకటించాడు. పాకిస్థాన్​లో పుట్టి పెరిగిన ఈ క్రికెటర్​ ప్రపంచకప్ అనంతరం టీ 20లకు మాత్రమే అందుబాటులో ఉంటానని తెలిపాడు. కుర్రాళ్లకి అవకాశమివ్వాలని ఈ నిర్ణయం తీసుకున్నానని వెల్లడించాడు.

"దేశం తరఫున ఆడటాన్ని ఎప్పుడూ ఆస్వాదిస్తా. జాతీయ జట్టులో సభ్యుడిగా ప్రపంచకప్​లో ఆడటమే గొప్ప గౌరవంగా భావిస్తా. నాకదే పెద్ద ఘనత. ఈ టోర్నీలో జట్టు విజయాలకు నా వంతు కృషి చేస్తాను. కుర్రాళ్లకి అవకాశమివ్వాలి. వన్డేల నుంచి దూరమైనా.. టీ 20 ఫార్మాట్​లో కొనసాగుతాను"
-- ఇమ్రాన్ తాహిర్, దక్షిణాఫ్రికా ఆటగాడు

ఎనిమిదేళ్ల తన కెరీర్​లో ఎన్నో ప్రశంసలు అందుకున్నాడీ క్రికెటర్​. 2011లో తొలి అంతర్జాతీయ మ్యాచ్ ఆడిన తాహిర్ 95 వన్డేల్లో 24.56 సగటుతో 156 వికెట్లు తీశాడు. వన్డేల్లో దక్షిణాఫ్రికా తరపున వేగంగా 100 వికెట్లు తీసిన ఆటగాడిగా రికార్డు సృష్టించాడు. ఒక వన్డే ఇన్నింగ్స్​లో 7 వికెట్లు తీసిన తొలి సౌతాఫ్రికా ఆటగాడు తాహిరే కావడం విశేషం.