విండీస్​ ప్రపంచకప్​ జట్టుకు వైస్​ కెప్టెన్​గా గేల్​

ఇంగ్లండ్​లో జరిగే వ‌న్డే ప్ర‌పంచ‌క‌ప్ టోర్నీలో వెస్టిండీస్‌ జట్టుకు వైస్‌ కెప్టెన్‌గా వ్యవహరించనున్నాడు క్రిస్​గేల్​. ఈ విషయాన్ని విండీస్​ బోర్డు ట్విట్టర్​ ద్వారా వెల్లడించింది.

విధ్వంసకర బ్యాట్స్‌మన్‌ క్రిస్‌గేల్‌ను ప్రపంచకప్​ జట్టుకు ఉపసారథిగా నియమిస్తూ నిర్ణయం తీసుకుంది విండీస్‌ క్రికెట్‌ బోర్డు. ఈ జమైకన్​ వీరుడు చివరగా 2010 జూన్‌లో పరిమిత ఓవర్ల క్రికెట్​కు కెప్టెన్​గా వ్యవహరించాడు. ఇన్నేళ్ల తర్వాత వైస్​ కెప్టెన్​గా కీలక బాధ్యతలు అప్పగించడంపై గేల్‌ సంతోషం వ్యక్తం చేశాడు. విండీస్ సార‌థిగా జాస‌న్ హోల్డ‌ర్ కొనసాగుతున్నాడు.

వెస్టిండీస్​ ప్రపంచకప్​ జట్టు

"ఏ ఫార్మాట్లోనైనా వెస్టిండీస్‌కు ప్రాతినిధ్యం వహించడాన్ని గౌరవంగా భావిస్తా. వరల్డ్‌ కప్‌ టోర్నీ నాకు చాలా ప్రత్యేకమైనది. ఒక సీనియర్‌ ఆటగాడిగా కెప్టెన్‌కు , జట్టుకు సహకారం ఇవ్వడం నా బాధ్యత. ప్రపంచకప్‌ టోర్నీలో అంచనాలు భారీగానే ఉంటాయి. వెస్టిండీస్‌ ప్రజల కోసం మేమంతా అత్యుత్తమ ప్రదర్శన చేస్తాం"
-- క్రిస్​ గేల్​, వెస్టిండీస్​ ఆటగాడు