వెస్టిండీస్తో ప్రపంచకప్ 29వ మ్యాచ్లో న్యూజిలాండ్ 6 వికెట్లు కోల్పోయి 291 పరుగులు చేసింది. మాంచెస్టర్ వేదికగా జరుగుతున్న ఈ మ్యాచ్లో కివీస్ కెప్టెన్ కేన్ విలియమ్సన్ (148) శతకంతో రెచ్చిపోగా.. రాస్ టేలర్ (69) అర్ధసెంచరీతో ఆకట్టుకున్నాడు. విండీస్ బౌలర్లలో కాట్రెల్ 4 వికెట్లు తీయగా.. క్రిస్ గేల్ ఓ వికెట్ తన ఖాతాలో వేసుకున్నాడు.
టాస్ ఓడి బ్యాటింగ్కు దిగిన కివీస్కు ఆరంభంలోనే ఎదురుదెబ్బ తగిలింది. ఇన్నింగ్స్ తొలి బంతికే గప్తిల్ వికెట్ కోల్పోయింది. అదే ఓవర్ ఐదో బంతికి మున్రోను పెవిలియన్ చేర్చాడు కాట్రెల్. అనంతరం వచ్చిన విలియమ్సన్- రాస్ టేలర్ ఇన్నింగ్స్ను గాడిలో పెట్టారు. మరో వికెట్ పడకుండా నిలకడగా ఆడారు. వీరిద్దరూ 167 పరుగుల భాగస్వామ్యం నమోదు చేశారు.
శతకంతో ఆకట్టుకున్న కివీస్ కెప్టెన్..
7 పరుగులకే రెండు వికెట్లు కోల్పోయీ పీకల్లోతు కష్టాల్లో ఉన్న జట్టును విలియమ్సన్, టేలర్ ఆదుకున్నారు. కేన్ విలియమ్సన్ 154 బంతుల్లో 148 పరుగులు చేశాడు. ఇందులో 15 ఫోర్లు, ఓ సిక్సర్ ఉన్నాయి. రాస్ టేలర్ అర్ధశతకంతో రాణించాడు. 69 పరుగుల వ్యక్తిగత స్కోరు వద్ద గేల్ బౌలింగ్లో హోల్డర్కు క్యాచ్ ఇచ్చాడు టేలర్.