'డివిలియర్స్​ను ఆడించకపోవడం మంచిదే'

డివిలియర్స్​పై దక్షిణాఫ్రికా బోర్డు నిర్ణయం సరైనదే అని ఆ దేశ మాజీ ఆటగాడు జాంటీ రోడ్స్ అభిప్రాయపడ్డాడు. ప్రపంచకప్​ ఆడేందుకు సుముఖత వ్యక్తం చేసిన డివిలియర్స్​ కోరికను తిరస్కరించింది ప్రొటీస్ బోర్డు.

ఏబీ డివిలియర్స్​ను ప్రపంచకప్​ జట్టులోకి చేర్చుకోకపోవడం సరైన నిర్ణయమే అని దక్షిణాఫ్రికా మాజీ ఆటగాడు జాంటీ రోడ్స్​ అభిప్రాయపడ్డాడు. ఒక్కరి కోసం చూసుకుంటే జట్టు మొత్తం మీద ప్రభావం పడుతుందన్నాడు.

"నేను డివిలియర్స్​కు పెద్ద అభిమానిని. కానీ చివరి నిమిషంలో అతడు మళ్లీ జట్టులోకి రావడం సరైనది కాదు. ఆ నిర్ణయం మిగిలిన ఆటగాళ్ల మీద ప్రభావం చూపుతుంది. ఈ విషయంలో దక్షిణాఫ్రికా బోర్డు సరైన నిర్ణయమే తీసుకుంది -జాంటీ రోడ్స్​, దక్షిణాఫ్రికా మాజీ ఆటగాడు.

గత ఏడాది మే లో అంతర్జతీయ క్రికెట్ నుంచి డివిలియర్స్ వైదొలిగిన సంగతి తెలిసిందే. అయితే దక్షిణాఫ్రికా ప్రపంచకప్ తుదిజట్టు ఎంపిక ముందు మళ్లీ వస్తానని తన అభిప్రాయాన్ని ప్రొటీస్ బోర్డు ముందు ఉంచాడు డివిలియర్స్​. అందుకు వారు అంగీకరించలేదు.

ఈ ప్రపంచకప్​లో సెమీస్​ రేసు నుంచి దక్షిణాఫ్రికా అందరికంటే ముందుగానే వైదొలిగింది. సమష్టిగా రాణించడంలో విఫలమైన ప్రొటీస్ ఈ ప్రపంచకప్​లో ఇప్పటి వరకు ఆడిన మ్యాచుల్లో 2 విజయాలు మాత్రమే సాధించింది.

ఇది చదవండి: వెస్టిండీస్​ పోరుతో అదృష్టాన్ని పరీక్షించుకోనున్న శ్రీలంక