అభిమానానికి హద్దు లేదు. ఇప్పటికే సినీతారలకు మందిరాలను కట్టే వారు, ఒంటి మీద పచ్చబొట్టు పొడిపించుకునే వారు.. ఆరాధించే వారి కోసం దేవుళ్లని మొక్కే ఫ్యాన్స్ని ఇలా చాలామందిని చూసుంటాం. కానీ ఓ వ్యక్తి దేవుడినే క్రికెటర్ల రూపంలో మార్చి మరీ కొలుస్తున్నాడు. ఆటగాళ్ల రూపంలోని వినాయకుడి విగ్రహాలకు పూజలు చేస్తూ భారత్ ప్రపంచకప్ నెగ్గాలని ప్రార్థిస్తున్నాడు.
తమిళనాడుకు చెందిన కేఆర్ రామకృష్ణన్ అనే వ్యక్తికి క్రికెట్ అంటే అమితమైన ఇష్టం. ఆ ఇష్టం ఎంత వరకు వెళ్లిందంటే ఓ మందిరాన్ని నిర్మించేంత వరకు. క్రికెట్ గణేశ్ టెంపుల్ పేరుతో నిర్మించిన ఈ గుడి చెన్నైలో బాగా ప్రాచుర్యం పొందింది. ఆటగాళ్ల ఆకృతిలో వినాయకుడి విగ్రహాలు ప్రతిష్టించాడు.
అంతేకాదు క్రికెట్ మంత్రాలు చదువుతూ ఆ విఘ్నేశ్వరుడిని ప్రసన్నం చేసుకునేందుకు ప్రయత్నిస్తున్నాడు. వినాయకుడు బ్యాటింగ్ చేసినట్టు, పీల్డింగ్ చేసినట్టు, షాట్ ఆడుతున్నట్టు ఉన్న విగ్రహాల ఆకృతులు ఎంతగానో ఆకర్షిస్తున్నాయి.
"నేను వినాయకుడి భక్తుడిని. గణేశుడి కోసం క్రికెట్ మంత్రాలను కూడా రూపొందించాను. మొత్తం 108 పద్యాలు ఉన్నాయి. క్రికెట్ విఘ్నేశ్వరుడి కోసం భజనలు కూడా చేస్తాను. 2011 ప్రపంచకప్ ముందు వికెట్ కీపర్ వినాయకుడి విగ్రహాన్ని ప్రతిష్టించాను. ఈ విగ్రహం ధోనికి శక్తి ఇచ్చింది. 2011లో వరల్డ్కప్ సాధించిపెట్టాడు మహీ" -కే ఆర్ రామకృష్ణన్, క్రికెట్ గణేశ్ టెంపుల్ నిర్మాత