వెస్టిండీస్తో జరిగిన ప్రపంచకప్ మ్యాచ్లో ఆస్ట్రేలియా 15 పరుగుల తేడాతో గెలిచింది. టాస్ గెలిచి బౌలింగ్ ఎంచుకుంది విండీస్. ఆస్ట్రేలియా 289 పరుగుల లక్ష్యం నిర్దేశించింది. అనంతరం బ్యాటింగ్కు దిగింది విండీస్. కరీబీయన్ బ్యాట్స్మెన్ షాయ్ హోప్(68), హోల్డర్(51) అర్ధశతకాలతో ఆకట్టుకున్నప్పటికీ జట్టును గెలిపించలేకపోయారు. నాటింగ్హామ్ వేదికగా జరిగిన ఈ మ్యాచ్లో ఆసీస్ బౌలర్ స్టార్క్ ఐదు వికెట్లతో విజృంభించగా... కమిన్స్ రెండు, ఆడమ్ జంపా ఓ వికెట్ తమ ఖాతాలో వేసుకున్నారు.
92 పరుగులతో ఆకట్టుకున్న ఆసీస్ ఆటగాడు నాథన్ కౌల్టర్నైల్కు 'మ్యాన్ ఆఫ్ ద మ్యాచ్' అవార్డు దక్కింది.
289 పరుగుల లక్ష్య ఛేదనలో బరిలో దిగిన విండీస్కు ఆరంభంలోనే ఎదురుదెబ్బ తగిలింది. ఓపెనర్ లూయిస్(1).. స్టార్క్ బౌలింగ్లో ఔటయ్యాడు. కాసేపటికీ క్రిస్ గేల్ను(21) పెవిలియన్ చేర్చాడు కమిన్స్. అనంతరం నీకోలస్ పూరన్(40), షాయ్ హోప్ జోడి నిలకడగా ఆడింది. వీరిద్దరూ 68 పరుగుల భాగస్వామ్యం నమోదు చేశారు. పూరన్ను ఔట్ చేసి ఈ జోడీని విడదీశాడు జంపా.
షాయ్ హోప్, హోల్డర్ అర్ధశతకాలు..
పూరన్ ఔటైన తర్వాత హోప్, హోల్డర్ నిలకడగా ఆడారు. హోప్ ఆచితూచి ఆడగా.. హోల్డర్ ప్రత్యర్థి బౌలర్లపై ఎదురు దాడికి దిగాడు. 68 పరుగుల వద్ద కమిన్స్ బౌలింగ్లో హోప్ ఔటయ్యాడు. అనంతరం వచ్చిన రసెల్ దూకుడుగా ఆడే ప్రయత్నంలో స్టార్క్ బౌలింగ్లో మ్యాక్స్వెల్కు క్యాచ్ ఇచ్చాడు. అర్ధశతకం పూర్తి చేసి హోల్డర్ కూడా ఔటయ్యాడు. వేగంగా 150 వికెట్లు తీసిన ఆటగాడిగా స్టార్క్ ఘనత సాధించాడు. 77 మ్యాచ్ల్లోనే ఈ రికార్డు అందుకున్నాడు.