ప్రపంచకప్ 2019కు అన్ని టీమ్లు తమ అస్త్రాలను సిద్ధం చేసుకుంటున్నాయి. మే 30న ఇంగ్లాండ్ వేదికగా ప్రారంభంకానున్న ఈ మెగాటోర్నీ ఆల్రౌండర్లదని వెస్టిండీస్ మాజీ కెప్టెన్ క్లైవ్ లోయడ్ అభిప్రాయపడ్డాడు. అన్ని జట్లలో మంచి ఆల్రౌండర్లున్నారని తెలిపాడు. అలాంటి అత్యుత్తమ ఆల్రౌండర్లపై ఓ లుక్కేద్దామా!
ఆండ్రీ రసెల్(వెస్టిండీస్)..
ఈ ఐపీఎల్ సీజన్లో బాగా ఆడిన ఆటగాడు అని ఎవరినైనా అడిగితే.. ఆండ్రీ రసెల్ అని ఎక్కువ మంది తడుముకోకుండా బదులిస్తారు. ఆ రకంగా కోల్కతా తరపున విధ్వంసం సృష్టించాడీ కరేబియన్ ఆటగాడు. 58 ఐపీఎల్ మ్యాచ్లాడిన రసెల్ 130 సిక్సులు కొట్టాడు. సగటున ప్రతి 5 బంతులకు ఓ సిక్సర్ బాది తనేంటో చూపించాడు. జనవరి 2017లో డోప్ పరీక్షలో విఫలమై జాతీయ జట్టుకు దూరమైన రసెల్ ఐపీఎల్ టోర్నీలో సత్తా చాటుతున్నాడు. మీడియం పేసర్గా వికెట్లు తీస్తూ నిలకడగా రాణిస్తున్నాడు. ఈ ఐపీఎల్లో 13 మ్యాచ్లు ఆడిన రసెల్ 510 పరుగులు చేశాడు. ఐపీఎల్ తరహాలో వరల్డ్కప్లోనూ రెచ్చిపోతే.. మిగతా జట్లకు గెలుపు కష్టమే.
హార్ధిక్ పాండ్య(భారత్)..
రసెల్ తర్వాత ఆ రేంజ్లో ఆకట్టుకున్న ఆల్రౌండర్ హార్ధిక్ పాండ్యనే. బ్యాటింగ్, బౌలింగ్... రెండింటిలోనూ తనదైన రీతిలో సత్తాచాటుతున్నాడు. ఈ ఐపీఎల్ సీజన్లో ముంబయి ఇండియన్స్ తరపున 13 ఇన్నింగ్స్లో 402 పరుగులు చేశాడు. అన్ని ఫార్మాట్లలోనూ నిలకడగా రాణిస్తున్న హార్ధిక్ పాండ్య ప్రపంచకప్లో భారత్కు కీలకంగా మారాడు. ఫించ్ హిట్టర్గా పేరొందిన పాండ్య ఈ ఐపీఎల్లో హెలికాప్టర్ షాట్లతో అందరినీ ఆశ్చర్యపరిచాడు.
బెన్స్టోక్స్(ఇంగ్లాండ్)..
ప్రస్తుతమున్న ఆల్రౌండర్లలో ముందువరుసలో ఉన్న ఆటగాడు బెన్స్టోక్స్. బ్యాటింగ్లో ఎంతగా రెచ్చిపోతాడో.. బౌలింగ్లోనూ అదే విధంగా ఆకట్టుకుంటున్నాడు. ఇంగ్లాండ్ జాతీయ జట్టులో క్రియాశీల పాత్ర పోషిస్తున్న స్టోక్స్ ఇటీవల జరిగిన పాకిస్థాన్ సిరీస్లో సత్తాచాటాడు. ఆ సిరీస్లోని ఓ మ్యాచ్లో 71 పరుగులతో పాటు మూడు వికెట్లను తన ఖాతాలో వేసుకుని ఇంగ్లాండ్ విజయంలో ముఖ్య పాత్ర పోషించాడు. 2017 ఐపీఎల్ సీజన్లో ఆకట్టుకున్న స్టోక్స్ను తర్వాత జరిగిన వేలంలో ఎక్కువ మొత్తం వెచ్చించి జట్టులోకి తీసుకుంది రాజస్థాన్. ప్రస్తుతం స్వదేశంలో జరగనున్న వరల్డ్కప్లో సత్తాచాటేందుకు కసరత్తులు చేస్తున్నాడు స్టోక్స్.
మార్కస్ స్టాయినీస్(ఆస్ట్రేలియా)..
మార్చిలో భారత్ - ఆస్ట్రేలియా మధ్య జరిగిన వన్డే సిరీస్లో స్టాయినీస్ సత్తాచాటాడు. ఫైనల్ మ్యాచ్లో 140 పరుగులతో ఆకట్టుకోవడమే కాదు.. విరాట్ కోహ్లీ వికెట్ తీసి సిరీస్ విజయంలో కీలక పాత్ర పోషించాడు. ఈ సిరీస్ను ఆసీస్ 3-2 తేడాతో గెలిచింది. అనంతరం విరాట్ మాట్లాడుతూ స్టాయినీస్ అత్యంత ప్రమాదాకారి అని అన్నాడు. భారత్పై సిరీస్ విజయంతో పాటు ఇటీవల యూఏఈలో పాకిస్థాన్తో జరిగిన వన్డే సిరీస్లోనూ ఆకట్టుకున్నాడు. డిఫెండింగ్ ఛాంపియన్గా బరిలోకి దిగుతున్న ఆసీస్కు స్టాయినీస్ కీలకంగా మారాడు.
షకీబ్ అల్ హసన్(బంగ్లాదేశ్)..
ఇప్పటికే ప్రపంచ అత్యుత్తమ ఆల్రౌండర్గా పేరు తెచ్చుకున్న షకీబ్ అల్ హసన్ బంగ్లాదేశ్ జట్టులో కీలక ఆటగాడు. ప్రస్తుతమున్న ఆల్రౌండర్లందరిలోనూ అనుభవజ్ఞుడు. గత దశాబ్ద కాలంగా బంగ్లాకు ఎన్నో విజయాలు అందించిన షకీబ్ గత వారం ఐర్లాండ్తో జరిగిన మ్యాచ్లో రిటైర్డ్ హర్ట్గా వెనుదిరిగాడు. ఈ కారణంగా ప్రపంచకప్ దగ్గరకొస్తున్న తరుణంలో షకీబ్ ఆడేది లేనిది సందిగ్ధం నెలకొంది. కెప్టెన్ మోర్తాజాకు షకీబ్ లాంటి అనుభవజ్ఞుడి అవసరం చాలా ఉంది. బ్యాటింగ్, బౌలింగ్ రెండింటిలోనూ జట్టును ఆపద సమయంలో గట్టెక్కించగల సమర్థుడు షకీబ్.
ఇది చదవండి: WC19: పాక్ జట్టులో మార్పులకు కారణం?
