'ఆసీస్ ఆటగాళ్లున్నారని లిఫ్టు ఎక్కనివ్వలేదు'

ఆస్ట్రేలియా పర్యటన సందర్భంగా జరిగిన మరో సంఘటనను స్పిన్నర్​ అశ్విన్​ పంచుకున్నాడు. అక్కడి క్వారంటైన్​ ఆంక్షలు కఠినంగానే కాక.. విచిత్రంగా ఉన్నాయని తెలిపాడు. ప్రత్యర్థి జట్టున్న లిఫ్టులోకి తమను ఎక్కనివ్వలేదని పేర్కొన్నాడు. ఇది తమనెంతో బాధించిందని ఆవేదన వ్యక్తం చేశాడు.

ఆస్ట్రేలియాలో క్వారంటైన్‌ ఆంక్షలు కఠినంగానే కాక.. విచిత్రంగానూ అనిపించాయని టీమ్‌ఇండియా సీనియర్‌ స్పిన్నర్‌ రవిచంద్రన్‌ అశ్విన్‌ అన్నాడు. ఇరు జట్లు ఒకే బయో బుడగలో ఉన్నప్పటికీ.. ఆసీస్‌ ఆటగాళ్లున్న లిఫ్ట్‌లోనికి తమను ఎక్కనివ్వలేదని పేర్కొన్నాడు. ఆ సమయంలో చాలా బాధగా అనిపించిందని యాష్​ వెల్లడించాడు.

కరోనా వైరస్‌ వల్ల ఆసీస్‌ పర్యటన సాంతం టీమ్‌ఇండియా ఆటగాళ్లు ఆంక్షల్లో ఉండాల్సి వచ్చింది. బయో బుడగలో ఉన్నప్పటికీ సిడ్నీ, మెల్‌బోర్న్‌, బ్రిస్బేన్​ల‌లో వేర్వేరు నిబంధనలు పాటించాల్సి వచ్చింది. అక్కడి సాధారణ పౌరుల కన్నా కఠినంగా భారత ఆటగాళ్లకు నిబంధనలు విధించారు. ఆసీస్‌లో అడుగుపెట్టిన వెంటనే కఠిన క్వారంటైన్‌లో ఉన్నా.. బ్రిస్బేన్‌లోనూ మళ్లీ క్వారంటైన్‌ కావాలని ఆదేశించారు. బీసీసీఐ జోక్యం చేసుకోవడంతో కొన్నింటిని మినహాయించారు. చిత్రవిచిత్రమైన ఆంక్షలు విధించడమే కాకుండా భారత ఆటగాళ్లు నిబంధనలు పాటించేందుకు ఇష్టపడటం లేదన్నట్టుగా అక్కడి మీడియా దుష్ప్రచారానికి పాల్పడ్డ సంగతి తెలిసిందే.

'మేం సిడ్నీకి చేరుకోగానే మమ్మల్ని కఠిన ఆంక్షల మధ్య బంధించారు. పైగా అక్కడే ఒక ప్రత్యేకమైన సంఘటన చోటు చేసుకుంది. నిజం చెప్పాలంటే చాలా వింతగా అనిపించింది. భారత్‌, ఆసీస్‌ ఆటగాళ్లు ఒకే బయో బుడగలో ఉన్నారు. ఆసీస్‌ ఆటగాళ్లు ఒక లిప్ట్‌లో ఉండగా అందులోకి మమ్మల్ని అనుమతించలేదు' అని ఈ ఆఫ్ స్పిన్నర్​ చెప్పాడు.

'గాయ్స్‌.. అప్పుడు చాలా బాధపడ్డాం. మేమంతా ఒకే బుడగలో ఉన్నాం. అలాంటిది వారు ఉన్న లిప్టులోకి మమ్మల్ని అనుమతించలేదు. వారితో కలిసి ఆ చోటును పంచుకోనివ్వలేదు. దీనిని జీర్ణించుకోవడానికి ఇబ్బంది పడ్డాం. ఒకే బుడగలో ఉన్నప్పుడు ఒకే లిప్ట్‌లో వెళ్తే మాత్రం తప్పేంటి?' అని యాష్‌ ప్రశ్నించాడు.

ఇదీ చదవండి:శ్రీలంకపై ఇంగ్లాండ్​ గెలుపు- సిరీస్​ క్లీన్​స్వీప్​