మ్యాక్స్వెల్.. అతడి విధ్వంసకర ఇన్నింగ్స్ క్రికెట్ అభిమానులకు తెలిసిందే. బాదడం మొదలు పెడితే ఎలాంటి బౌలర్కయినా చుక్కలే . తాజాగా జరుగుతున్న బిగ్బాష్ లీగ్లోనూ అదరగొట్టేస్తున్నాడు. మరి అలాంటి బ్యాట్స్మన్ను భారత్తో సిరీస్ ముంగిట ఎందుకు ఎంపిక చేయలేదు. ఇదే ప్రతి ఒక్కరి ప్రశ్న. మ్యాక్స్ను ఎంపిక చేయకపోవడం అభిమానులనే కాదు.. టీమిండియా సారథి విరాట్ కోహ్లీనీ ఆశ్చర్యపర్చిందట.ఆస్ట్రేలియా సారథి ఫించ్తో మాట్లాడిన కోహ్లీ.. ఇదే విషయాన్ని ప్రస్తావించాడట. గతేడాది భారత్తో జరిగిన టీ20లో మ్యాక్స్వెల్ సెంచరీ చేసిన విషయాన్ని గుర్తుచేసుకున్నాడట విరాట్.
ఇదే కారణం..!
భారత్తో పోరులో మ్యాక్స్వెల్ లాంటి హార్డ్ హిట్టర్ లేకపోవడం వల్ల ఆస్ట్రేలియా మిడిలార్డర్ కాస్త బలహీనంగా కనిపించింది. ఆల్రౌండర్ మార్కస్ స్టొయినిస్ కూడా టీమిండియాతో సిరీస్కు దూరమయ్యాడు. అయితే వీరిద్దరూ 2019 ప్రపంచకప్లో దారుణంగా విఫలమయ్యారు. కానీ కొన్ని నెలల విరామం తర్వాత బిగ్బాష్లో అడుగుపెట్టిన మ్యాక్స్వెల్.. అటు బంతితోనూ, బ్యాట్తోనూ రాణిస్తున్నాడు. అయితే బిగ్బాష్ ముందు నాటికే ఆటగాళ్ల స్థానాలు ఫిక్స్ చేసినట్లు ఫించ్ వెల్లడించాడు.
మ్యాక్స్ ఫామ్లో లేకపోవడం వల్లే ఆస్టన్ టర్నర్ను జట్టులోకి తెచ్చినట్లు చెప్పుకొచ్చాడు ఫించ్. అయితే టర్నర్ కూడా భారత్తో సిరీస్లో విఫలమవడం వల్ల.. వచ్చే నెలలో దక్షిణాఫ్రికాతో వన్డే సిరీస్కు మ్యాక్స్ మళ్లీ బరిలోకి దిగనున్నట్లు వార్తలు వస్తున్నాయి. అయితే ఫించ్ మాత్రం అతడికి ప్రస్తుతం టాప్-7లో చోటు లేదని అభిప్రాయపడుతున్నాడు. ఎంపిక చేసిన స్థానాల్లో మార్పులు జరగవని చెప్పాడు.
