టీమ్ఇండియా యువ బ్యాట్స్మన్ సూర్యకుమార్ యాదవ్పై ప్రశంసల జల్లు కురిపించాడు భారత మాజీ క్రికెటర్ వీవీఎస్ లక్ష్మణ్. "ఈ తరం యువకులకు (ముఖ్యంగా భారత యువకులకు) అతడొక రోల్ మోడల్" అని కొనియాడాడు.
"ఈ తరం యువకులకు అతడు (సూర్య కుమార్ యాదవ్) ఒక రోల్ మోడల్. ప్రతిభ ఉన్నప్పటికీ.. భారత జట్టులో చోటు కోసం సుదీర్ఘ కాలం వేచి చూశాడు. చివరికి ఫలితం పొందాడు. ఇంతగా వేచి చూసే ఓపిక వేరొకరికి ఉండదేమో. టీమ్ఇండియాకు ఎంపిక కాకపోవడం వల్ల అతడు నిరాశ చెందలేదు. తిరిగి ఫస్ట్ క్లాస్ క్రికెట్లో అడుగుపెట్టి తానేంటో నిరూపించుకున్నాడు. ముంబయి ఇండియన్స్ తరఫున రాణించాడు."
-వీవీఎస్ లక్ష్మణ్, భారత మాజీ క్రికెటర్.
సూర్య ఆడిన మ్యాచ్లు దాదాపు కఠిన పరిస్థితుల్లో ఆడినవేనని లక్ష్మణ్ అభిప్రాయపడ్డాడు. ముంబయికి ఎన్నో సందర్భాల్లో విజయాలను అందించాడని తెలిపాడు. "సెలెక్టర్లు నీకు మొండిచెయ్యి చూపిస్తే నీ ప్రదర్శనతోనే వారు ఎంపిక చేసేటట్లు నిరూపించుకోమని మా కోచ్ చెప్పేవారు. ఇప్పుడు సూర్యను చూస్తుంటే ఆ మాటలు గుర్తుకొస్తున్నాయి. ఇంగ్లాండ్తో టీ20లకు తుది జట్టులో అతనికి చోటు దక్కుతుందో లేదో తెలీదు. కానీ అందుకు అతడు పూర్తిగా అర్హుడు" అని లక్ష్మణ్ వెల్లడించాడు.
సూర్యకుమార్ యాదవ్.. దేశవాళీ క్రికెట్లో, ఐపీఎల్లో స్థిరంగా రాణిస్తున్నాడు. అయినప్పటికీ ఆస్ట్రేలియాతో సిరీస్లో అతడిని జట్టులోకి ఎంపిక చేయకపోవడంపై చాలా మంది బహిరంగంగానే ప్రశ్నించారు. దీంతో ఇంగ్లాండ్తో టీ20లకు అతన్ని ఎంపిక చేసింది సెలక్షన్ కమిటీ.
ఇదీ చదవండి:'మొతేరాలో వేడి తట్టుకోలేకపోయా.. 5 కేజీల బరువు తగ్గా'
