ఆసీస్- భారత్​ వన్డే​: అరుదైన రికార్డులపై రోహిత్‌ కన్ను

భారత స్టార్ ఓపెనర్ రోహిత్ శర్మ కోసం పలు రికార్డులు ఎదురుచూస్తున్నాయి. నేటి నుంచి జరిగే ఆస్ట్రేలియా వన్డే సిరీస్​లో వాటిని అధిగమిస్తాడేమో చూడాలి.

టీమిండియా ఓపెనర్​ రోహిత్‌ శర్మ.. మూడు ఫార్మాట్లలో ఓపెనర్​గా అదరగొడుతున్నాడు. మంచి ఫామ్​లో ఉన్న హిట్​మ్యాన్​​ను పలు రికార్డులు ఊరిస్తున్నాయి. భారత్​- ఆస్ట్రేలియా తొలి వన్డేలో వీటిలో ఎన్ని బ్రేక్​ అవుతాయో చూడాలి.

టీమిండియా ఓపెనర్​ రోహిత్‌ శర్మ

రోహిత్​-ధావన్​ భాగస్వామ్యం

భారత జట్టు స్టార్​ ఓపెనర్లు రోహిత్​, శిఖర్ ధావన్‌ అరుదైన రికార్డుపై కన్నేశారు. ఆస్ట్రేలియాపై వీరిద్దరు కలిసి శతక భాగస్వామ్యం నెలకొల్పితే అరుదైన ఘనత సాధిస్తారు. వన్డేల్లో ఒకే జట్టుపై అత్యధిక శతక భాగస్వామ్యాలు సాధించిన జోడీగా రికార్డు సృష్టిస్తారు. ఈ జాబితాలో ప్రస్తుతం వెస్టిండీస్ ఆటగాళ్లు గ్రీనిడ్జ్‌-హేన్స్‌ జంటతో (భారత్‌పై 6) కలిసి రోహిత్‌-ధావన్‌ సమంగా నిలిచారు. మూడో స్థానంలో ధోనీ- యువరాజ్‌ సింగ్ ఉన్నారు. వీరిద్దరూ కలిసి పాకిస్థాన్‌పై 5 శతక భాగస్వామ్యాలు నెలకొల్పారు.

• ఆసీస్‌పై రోహిత్- ధావన్‌కు మంచి రికార్డు ఉంది. వీరిద్దరు కలిసి ఆసీస్‌పై 22 ఇన్నింగ్స్‌ల్లో 1,273 పరుగులు చేశారు. శ్రీలంక సిరీస్‌కు విశ్రాంతి తీసుకున్న హిట్‌మ్యాన్‌.. మంగళవారం మొదలయ్యే ఆసీస్‌ వన్డే సిరీస్‌తో పునరాగమనం చేయనున్నాడు.

సింగిల్​గానూ

ఓపెనర్‌గా అన్ని ఫార్మాట్లలో 10 వేల పరుగుల మైలురాయిని అందుకోవడానికి రోహిత్​కు ఇంకో 234 పరుగులు​ మాత్రమే అవసరం. అంతేకాకుండా 33 పరుగులు​ చేస్తే ఓపెనర్‌గా వన్డేల్లో 7 వేల మార్కును అందుకుంటాడు. ప్రస్తుతం హిట్​మ్యాన్​ ఖాతాలో 6977 పరుగులు ఉన్నాయి.

టీమిండియా ఓపెనర్​ రోహిత్‌ శర్మ

పాంటింగ్​ రికార్డుకు ఎసరు

వన్డేల్లో ఆస్ట్రేలియాపై రోహిత్ శర్మ సాధించిన పరుగులు 2037. ఈ రెండు జట్ల మధ్య జరిగిన మ్యాచ్‌ల్లో 2 వేలకు పైగా పరుగులు చేసిన ముగ్గురు క్రికెటర్లలో హిట్​మ్యాన్​ ఒకడు. ఈ జాబితాలో సచిన్ తెందూల్కర్​ (3,077), రికీ పాంటింగ్ (2,164) తొలి రెండు స్థానాల్లో ఉన్నారు.

• ఆసీస్‌పై 37 ఇన్నింగ్స్​లు ఆడిన రోహిత్​... 7 సెంచరీలు, 8 అర్ధశతకాలు సాధించాడు. కంగారూ జట్టుపై ఆడిన చివరి మూడు మ్యాచ్‌ల్లోనూ రోహిత్ మూడు అర్థ శతకాలు బాదాడు.

రోహిత్​ వన్డే పరుగులు

వన్డే కెరీర్‌లో 214 ఇన్నింగ్స్‌లు ఆడిన రోహిత్... 8994 పరుగులు చేశాడు. మరో 6 రన్స్​ చేస్తే 9 వేల మైలురాయిని అందుకుంటాడు. అత్యంత వేగంగా ఈ మార్కును చేరిన మూడో క్రికెటర్‌గా నిలుస్తాడు. కోహ్లీ (194), ఏబీ డివిలియర్స్ (205) తొలి రెండు స్థానాల్లో ఉన్నారు.

• ఆస్ట్రేలియాతో టీమిండియా మూడు వన్డేలు ఆడనుంది. ముంబయి వేదికగా తొలి మ్యాచ్, జనవరి 17న రాజ్‌కోట్‌లో రెండో వన్డే, జనవరి 19న బెంగళూరులో ఆఖరి మ్యాచ్ జరగనుంది.