'ఏప్రిల్ కోసం కొన్ని పరుగులు దాచి ఉంచుకో'

న్యూజిలాండ్​తో జరిగిన చివరి వన్డేలో టీమిండియా క్రికెటర్ రాహుల్, కివీస్ ఆటగాడు జిమ్మీ నీషమ్ మధ్య చిన్న వివాదం చోటుచేసుకుంది. మ్యాచ్ అనంతరం దీనికి సంబంధించిన ఓ ఫొటోను సామాజిక మాధ్యమాల్లో పంచుకున్న నీషమ్ ఓ ఫన్నీ కామెంట్ జోడించాడు.

న్యూజిలాండ్​తో జరిగిన చివరి వన్డేలో టీమిండియా ఓటమిపాలైంది. అయితే ఈ మ్యాచ్​లో కేఎల్ రాహుల్, జిమ్మీ నీషమ్ మధ్య ఓ చిన్నపాటి ఘర్షణ జరిగింది. సింగిల్ తీసే సమయంలో నీషమ్ అడ్డుకున్నాడని రాహుల్ ఆరోపించాడు. ఈ క్రమంలో వీరిద్దరి మధ్య చిన్నపాటి వివాదం తలెత్తింది. అంపైర్ ఈ వివాదాన్ని సద్దుమణిగేలా చేశాడు. మ్యాచ్ అనంతరం నీషమ్ దీనికి సంబధించిన ఓ ఫొటోను సామాజిక మాధ్యమాల్లో పంచుకుని ఓ ఫన్నీ కామెంట్ జత చేశాడు.

ఇందులో రాహుల్‌, నీషమ్‌, అంపైర్‌ ఉన్న ఫొటోను షేర్‌ చేస్తూ "కాగితం, కత్తెర, బండ?" అంటూ క్యాప్షన్‌ ఇచ్చాడు. మరో పోస్ట్​లో "ఏప్రిల్‌ కోసం కొన్ని పరుగులు దాచి ఉంచడం మరువకు" అంటూ రాహుల్‌ను ఉద్దేశించి ట్వీట్‌ చేశాడు. ఐపీఎల్​లో నీషమ్‌ కింగ్స్‌ ఎలెవన్‌ పంజాబ్‌కు ప్రాతినిధ్యం వహిస్తున్నాడు. ఈ జట్టుకు రాహుల్ కెప్టెన్. అందుకే ఇలా సరదాగా ట్వీట్ చేశాడంటూ అభిమానులు అంటున్నారు.

ఈ మ్యాచ్​లో మొదట బ్యాటింగ్ చేసిన టీమిండియా నిర్ణీత 50 ఓవర్లలో 7 వికెట్ల నష్టానికి 296 పరుగులు చేసింది. లోకేష్ రాహుల్ (112) సెంచరీతో సత్తాచాటగా.. శ్రేయస్ అయ్యర్ (62) అర్ధశతకంతో ఆకట్టుకున్నాడు. అనంతరం బరిలోకి దిగిన కివీస్ 47.1 ఓవర్లలో లక్ష్యాన్ని ఛేదించింది. నికోల్స్ (80), గప్తిల్ (66), గ్రాండ్​హోమ్ (58) అర్ధశతకాలతో మెరిశారు.