తల్లులు కాబోతున్న మహిళా క్రికెట్ జంట

కివీస్ మహిళా క్రికెట్ జంట తల్లులు కాబోతున్నారు. కెప్టెన్ అమీ సాటర్త్​ వైట్​ త్వరలో పండంటి బిడ్డకు జన్మనివ్వబోతుంది. ఆమె భార్య లే తహుహూతో కలిసి ఈ విషయాన్ని ఇన్​ స్టాలో పంచుకుంది.

న్యూజిలాండ్ మహిళా క్రికెట్ జట్టు కెప్టెన్ అమీ సాటర్త్​వైట్ తల్లికాబోతుంది. అదే జట్టుకు చెందిన సీనియర్ బౌలర్​ లే తహుహూను ప్రేమించి పెళ్లి చేసుకున్న అమీ.. వచ్చే ఏడాది జనవరి కల్లా పండంటి బిడ్డకు జన్మనివ్వబోతుంది. గర్భం దృష్ట్యా క్రికెట్​ నుంచి తాత్కాలిక విరామం తీసుకోనుంది.

లే తహుహూ - అమీ సాటర్త్​వైట్.. ఇద్దరూ కట్టుబాట్లను ఎదిరించి పెళ్లి చేసుకున్నారు. ఈ విధంగా ఒక్కటైన తొలి మహిళా క్రికెట్ జంటగా రికార్డు సృష్టించారు. ప్రస్తుతం బేబీ శాటర్​హుహూ 2020లో రాబోతుంది అని ఇన్​ స్టాలో పంచుకుంది అమీ.అయితే ఏ విధానంలో తల్లి కాబోతుందో చెప్పలేదు.

"నేను, లే ఈ విషయాన్ని మీతో పంచుకునేందుకు తహతహలాడుతున్నాం. వచ్చే ఏడాది ప్రారంభంలో మాకో బిడ్డ పుట్టబోతుంది. మా జీవితంలో ఇది మాకు ఎంతో ప్రత్యేకమైన సమయం. ఈ అద్భుత ఘట్టంకోసం ఎదురుచూస్తున్నాం. -అమీ సాటర్త్​వైట్​, కివీస్ మహిళా జట్టు కెప్టెన్

న్యూజిలాండ్ క్రికెట్ బోర్డు తనకు మాతృత్వ సెలవుల ఇచ్చిందని అమీ తెలిపింది.

"న్యూజిలాండ్​ క్రికెట్ బోర్డు నాకు మద్దతుగా నిలవడం ఎంతో అదృష్టంగా భావిస్తున్నా. గర్భం కారణంగా ఆటకు బ్రేక్ తీసుకున్నా... జట్టుకు మార్గనిర్దేశకురాలిగా వ్యవహరిస్తా. -అమీ సాటర్త్​వైట్​, కివీస్ మహిళా జట్టు కెప్టెన్

కివీస్‌ బోర్డు కొత్త విధానం ప్రకారం 2019-20 కాలానికి ఆమె సెలవులు మంజూరు చేస్తున్నట్టు కాంట్రాక్టు ఇస్తున్నారు. ఈ కాలంలో పూర్తిస్థాయిలో వేతనం చెల్లించనున్నారు. గర్భం కారణంగా సెలవులు తీసుకోనున్న అమీ 2021 ప్రపంచకప్​లో రీ ఎంట్రీ ఇవ్వనుంది.

ఇప్పటి వరకు 119 వన్డేలు, 99 టీ20లు ఆడిందిఅమీ సాటర్త్​వైట్. వన్డేల్లో వెంటవెంటనే నాలుగు శతకాలు చేసిన క్రికెటర్‌గా రికార్డు సృష్టించింది​. గత ఏడాది సారథ్య బాధ్యతలు అందుకుంది. 28 ఏళ్ల తహూహూ 116 మ్యాచుల్లో 114 వికెట్లు పడగొట్టింది.

ఇది చదవండి: ఖాళీ సమయంలో కఠోర సాధన చేశా: ఉమేశ్​ యాదవ్​