టీమ్ఇండియా మాజీ కెప్టెన్‌ మహేంద్రసింగ్ ధోనీపై తాను ఆధారపడి లేనని స్పిన్నర్ కుల్దీప్ యాదవ్ తెలిపాడు. మహీ తనకు ఎప్పుడూ మార్గనిర్దేశం మాత్రమే చేశాడని స్పష్టం చేశాడు.
"నాకెప్పుడూ ధోనీ మార్గనిర్దేశం చేసేవాడు. బౌలర్‌ దృష్టిలో అత్యుత్తమ న్యాయ నిర్ణేత వికెట్‌ కీపరే. ధోనీకి ఎంతో అనుభవం ఉంది. బ్యాట్స్‌మెన్‌ ఎలా ఆడతారో అతడికి బాగా తెలుసు. అయితే ప్రపంచకప్‌ తర్వాత ధోనీ ఆడనంత మాత్రాన నన్ను నేను నిరూపించుకోవాల్సిన అవసరం లేదు. మహీ మీద ఆధారపడ్డానని చెప్పాల్సిన పనిలేదు. నా నైపుణ్యాన్ని మెరుగు పరుచుకునేందుకు మరింత బాగా పనిచేయగలను."