నెంబర్​వన్ బౌలర్.. వికెట్ మాత్రం లేదు

న్యూజిలాండ్​తో జరిగిన వన్డే సిరీస్​ను 0-3 తేడాతో కోల్పోయింది టీమిండియా. అయితే ఈ సిరీస్​లో భారత బౌలర్ బుమ్రా ఒక్క  వికెట్ కూడా తీయలేకపోయాడు. ఓ ద్వైపాక్షిక వన్డే సిరీస్​ను వికెట్ లేకుండా ముగించడం బుమ్రాకు ఇదే తొలిసారి.

జస్ప్రీత్ బుమ్రా.. ప్రస్తుతం వన్డేల్లో నెంబర్​వన్ బౌలర్​. పరిమిత ఓవర్లలోనే కాక టెస్టుల్లోనూ సత్తాచాటుతున్నాడు. కానీ న్యూజిలాండ్​తో జరిగిన మూడు వన్డేల సిరీస్​లో మాత్రం అతడి ప్రదర్శన అస్సలు బాలేదంటున్నారు విశ్లేషకులు. అందుకు కారణం లేకపోలేదు. ఈ సిరీస్​లో బుమ్రా ఒక్క వికెట్​ కూడా తీయలేకపోయాడు. అతడి ప్రదర్శన టీమిండియా ఓటమిపైనా ప్రభావం చూపిందని అంటున్నారు పండితులు.

ఓ ద్వైపాక్షిక వన్డే సిరీస్​ను వికెట్ లేకుండా ముగించడం బుమ్రాకు ఇదే తొలిసారి. ఈరోజు జరిగిన చివరి వన్డేలో బుమ్రా 10 ఓవర్లు వేసి వికెట్లు ఏమీ తీయకుండా 50 పరుగులు సమర్పించుకున్నాడు. అలాగే మొదటి, రెండో వన్డేలోనూ వరుసగా 64, 53 పరుగులు ఇచ్చాడు. మొత్తం ఈ సిరీస్​లో 30 ఓవర్లు వేసి 167 పరుగులు దారపోశాడు. ఇందులో ఒక మెయిడిన్మాత్రమే ఉంది.

చివరగా బుమ్రా ఆడిన ఆరు వన్డేల్లో ఒక వికెట్ మాత్రమే తీశాడు. దీంతో పోల్చుకుంటే టీ20 ప్రదర్శన కాస్త మెరుగ్గా ఉంది. ఈ ఏడాదిలో 7 టీ20లు ఆడి 8 వికెట్లు దక్కించుకున్నాడీ స్పీడ్ స్టార్.