జమైకా వేదికగా జరిగిన రెండో టెస్టులో వెస్టిండీస్పై భారత్ ఘన విజయం సాధించి సిరీస్ను 2-0తో క్లీన్ స్వీప్ చేసింది. భారత బౌలర్ల ధాటికి రెండో ఇన్నింగ్స్లో 210 పరుగులకు ఆలౌటైంది కరీబియన్ జట్టు. ఫలితంగా వెస్టిండీస్పై 257 పరుగుల భారీ విజయాన్ని అందుకుంది కోహ్లీసేన. తొలి ఇన్నింగ్స్లో శతకం, రెండో ఇన్నింగ్స్లో అర్ధశతకంతో విజృంభించిన హనుమ విహారీకి మ్యాన్ ఆఫ్ ది మ్యాచ్ అవార్డు దక్కింది.
రెండో ఇన్నింగ్స్లో షమి, జడేజా చెరో మూడేసి వికెట్లు పడగొట్టి టీమిండియా విజయంలో కీలక పాత్ర పోషించారు. మొదటి ఇన్నింగ్స్ హీరో బుమ్రా.. ఈసారి ఒక వికెట్ తీయగా, ఇషాంత్ శర్మ రెండు వికెట్లను తన ఖాతాలో వేసుకున్నాడు. టీమిండియా బౌలర్లకు వెస్టిండీస్ బ్యాట్స్మెన్ ఎదురు నిలువలేకపోయారు. ఆ జట్టులో ఒక్క ఆటగాడు(బ్రూక్స్) మినహాయిస్తే... మరెవరూ అర్ధశతకం కూడా చేయలేకపోయారు. రెండో ఇన్నింగ్స్లో కరీబియన్ జట్టులో ఆరుగురు సింగిల్ డిజిట్కే పరిమితమయ్యారు.
తొలి ఇన్నింగ్స్లో విహారీ 111 పరుగులు, సారథి విరాట్ కోహ్లీ 76 పరుగులతో ఆకట్టుకోవడం వల్ల భారత్ 416 పరుగులు చేసింది. బుమ్రా ధాటికి తొలి ఇన్నింగ్స్లో 117 పరుగులకే కుప్పకూలింది కరీబియన్ జట్టు. టెస్టు కెరీర్లో తొలిసారి హ్యాట్రిక్ సాధించాడు బుమ్రా. వెస్టిండీస్కు ఫాలో ఆన్ అప్పగించకుండా... రెండో ఇన్నింగ్స్లో బ్యాటింగ్కు దిగిన కోహ్లీసేన నాలుగు వికెట్లు కోల్పోయి 168 పరుగుల వద్ద డిక్లేర్ చేసిన సంగతి తెలిసిందే.
టెస్ట్ ఛాంపియన్షిప్ను టీమిండియా ఘనంగా ప్రారంభించింది. ఇప్పటివరకు జరిగిన రెండు టెస్టుల్లోనూ భారీ తేడాతో గెలుపొంది తన సామర్థ్యాన్ని మరోసారి చాటి చెప్పింది కోహ్లీసేన. 120 పాయింట్లతో అగ్రస్థానంలో కొనసాగుతోంది.
- భారత్ తరఫున అత్యధిక టెస్టులు గెలిచిన వారి జాబితాలో అగ్రస్థానానికి చేరుకున్నాడు కోహ్లీ(48 మ్యాచుల్లో 28 విజయాలు). విండీస్తో రెండో టెస్టు విజయంతో మాజీ కెప్టెన్ ధోనీ (60 టెస్టుల్లో 27 విజయాలు)ని వెనక్కినెట్టాడు విరాట్.
- పరుగుల పరంగా టెస్టుల్లో టీమిండియాకు ఇది ఆరవ అతిపెద్ద విజయం.
ఇదీ చూడండి:- 'ఈ శతకం చూసి మా నాన్న గర్విస్తుంటారు'
