'ఐపీఎల్​ తరహాలో ఆడమని రోహిత్​ చెప్పాడు'

ఇంగ్లాండ్​తో మ్యాచ్​కు ముందు రోహిత్​ శర్మ పలు సలహాలు ఇచ్చాడని తెలిపాడు భారత యువ ఓపెనర్​ ఇషాన్​ కిషన్​. ఎలాంటి ఒత్తిడికి లోను కావొద్దని.. ఐపీఎల్​ తరహాలో స్వేచ్ఛగా బ్యాట్ ఝుళిపించమని రోహిత్​ భాయ్​ సూచించాడని ఇషాన్​ వెల్లడించాడు.

రోహిత్ శర్మ చేసిన విలువైన సూచనల వల్లే తాను అద్భుత ఇన్నింగ్స్​ ఆడానని వెల్లడించాడు టీమ్​ఇండియా యువ ఓపెనర్​ ఇషాన్​ కిషన్​. ఎలాంటి ఒత్తిడికి లోనవ్వద్దు.. ఐపీఎల్​లో లాగా స్వేచ్ఛగా నీదైనా శైలిలో బ్యాటింగ్​ చేయమని రోహిత్ భాయ్​ సలహా ఇచ్చాడని కిషన్​ తెలిపాడు.

అంతర్జాతీయ క్రికెట్​లోకి అరంగేట్రం చేయాలని తపించిన ఇషాన్​ కిషన్​.. తన తొలి టీ20లోనే అర్థ సెంచరీ (56)తో అదరగొట్టాడు. భారత్​ మ్యాచ్​ గెలుపొందడంలో కీలక పాత్ర పోషించాడు. కెప్టెన్ కోహ్లీతో కలిసి రెండో వికెట్​కు 94 పరుగులు జోడించాడు.

"ఒక క్రికెటర్​గా నా విజయానికి చాలా మంది సాయపడ్డారు. ఇంగ్లాండ్​తో మ్యాచ్​కు ముందు రోహిత్​ భాయ్​ నా దగ్గరకు వచ్చి పలు సలహాలు ఇచ్చాడు. ఇన్నింగ్స్​ ఓపెన్​ చేస్తున్నావు.. ఎలాంటి ఒత్తిడికి లోను కావొద్దు.. ఐపీఎల్​ తరహాలో నీ సహజ శైలిలో బ్యాటింగ్​ చేయమని అతడు చెప్పాడు. టీమ్ఇండియా జెర్సీ ధరించినప్పుడు నీ వంతు పాత్ర పోషించాలని సూచించాడు."

-ఇషాన్​ కిషన్​, భారత యువ క్రికెటర్​.

అండర్​-19 ఆటగాళ్లైనా రిషభ్​ పంత్, వాషింగ్టన్​ సుందర్ టీమ్​ఇండియాలో చోటు సంపాదించడంపై ఇషాన్​ స్పందించాడు. వాళ్ల ప్రదర్శన పట్ల సంతోషంగా ఉన్నానని తెలిపాడు. ఇది చాలా గర్వంగా అనిపిస్తుందని పేర్కొన్నాడు. రోజు రోజుకీ తన ఆటను మెరుగుపరుచుకోవడానికి ప్రయత్నిస్తానని వెల్లడించాడు. క్రికెట్​లో చాలా మంది కొత్త ఆటగాళ్లు వస్తున్నారని.. ఏ స్థానంలోనైనా ఆడటానికి తాను సిద్ధమని కిషన్​ చెప్పాడు.

ఐపీఎల్​లో ఆడడం కలిసొచ్చింది..

ఐపీఎల్​లో జస్ప్రీత్​ బుమ్రా, ట్రెంట్​ బౌల్ట్​ వంటి అగ్రశ్రేణి బౌలర్ల బౌలింగ్​లో ఆడటం తనకు ప్రస్తుతం కలిసొచ్చిందని ఇషాన్​ కిషన్ వెల్లడించాడు. దీంతో ప్రస్తుతం జోఫ్రా ఆర్చర్​ లాంటి బౌలర్లను సమర్థంగా ఎదుర్కోవడానికి ఉపయోగపడిందని తెలిపాడు.

ఇదీ చదవండి:దంచేసిన ఇషాన్​- కోహ్లీ... భారత్​దే గెలుపు