విదేశీ గడ్డపై భారత్ మరోసారి తేలిపోయింది. న్యూజిలాండ్తో జరిగిన రెండు మ్యాచ్ల టెస్టు సిరీస్లో వైట్వాష్కు గురైంది టీమిండియా. కోహ్లీ సేన విధించిన 132 పరుగుల లక్ష్యాన్ని 3 వికెట్లు మాత్రమే కోల్పోయి ఛేదించింది కివీస్. ఓపెనర్లు టామ్ బ్లండెల్(55), లాథమ్(52) అర్ధసెంచరీలతో రాణించారు. వీరిరువురూ భారత బౌలర్లను దీటుగా ఎదుర్కొన్నారు. ఈ క్రమంలో తొలి వికెట్కు 103 పరుగుల భాగస్వామ్యం నమోదు చేశారు.
తొలుత లాథమ్ ఉమేశ్ బౌలింగ్లో వెనుదిరిగాడు. 5 పరుగులే చేసిన కెప్టెన్ విలియమ్సన్తో పాటు బ్లండెల్ను పెవిలియన్ పంపాడు బుమ్రా. అనంతరం.. టేలర్(5), నికోల్స్(5) లాంఛనాన్ని పూర్తి చేశారు. సిరీస్ న్యూజిలాండ్ వశమైంది. ఈ మ్యాచ్ మూడు రోజుల్లోనే ముగియడం విశేషం.
వికెట్లు టపా టపా..
అంతకుముందు ఓవర్నైట్ స్కోరు 90/6 తో మూడోరోజు బ్యాటింగ్ కొనసాగించిన భారత్ రెండో ఇన్నింగ్స్ ముగియడానికి ఎంతో సమయం పట్టలేదు. 10 ఓవర్లలోపే కథ ముగిసింది. 124 పరుగులకే ఆలౌటైంది. తొలి ఇన్నింగ్స్ ఆధిక్యం కలుపుకొని న్యూజిలాండ్ ముందు 132 పరుగుల స్వల్ప లక్ష్యాన్ని ఉంచింది. పుజారా(24) టాప్ స్కోరర్. ఇన్నింగ్స్లో రెండో అత్యధిక స్కోరు ఎక్స్ట్రా(21)లదే కావడం గమనార్హం. జడేజా(16), కోహ్లీ(14), పృథ్వీ షా(14) మినహా మరెవరూ రెండంకెల స్కోరు చేయలేకపోయారు.