క్రికెట్లో కంకషన్ సబ్స్టిట్యూట్పై ఐసీసీ సరైన నిర్ణయం తీసుకోవాలని ఆస్ట్రేలియా మాజీ బ్యాట్స్మన్ మార్క్ వా అభిప్రాయపడ్డాడు. ఇందుకోసం మ్యాచ్లో తలకు గాయాలను పరిశీలించడానికి ఇరుజట్లకు ఓ తటస్థ వైద్యుడ్ని నియమించాలని ఐసీసీకి విజ్ఞప్తి చేశాడు.
"కంకషన్పై ఓ నిర్ణయానికి వచ్చే ముందు ఇరుజట్లకు ఓ తటస్థ వైద్యుడ్ని నియమించే అవసరం ఉందని నేను భావిస్తున్నా. భారత జట్టు వైద్యుడు కచ్చితంగా వాళ్లు చెప్పినట్లే వింటాడు. అయితే ఆ వైద్యుడి నిర్ణయాన్ని నేను తప్పుపట్టడం లేదు. ఇరుజట్ల మధ్య ఓ తటస్థ వైద్య అధికారిని నియమించే నిర్ణయం తీసుకుంటే బాగుంటుందని నా అభిప్రాయం."
- మార్క్ వా, ఆస్ట్రేలియా మాజీ క్రికెటర్
ఇటీవలే ఆస్ట్రేలియా, టీమ్ఇండియా మధ్య జరిగిన తొలి టీ20లో ఆల్రౌండర్ రవీంద్ర జడేజా తలకు బంతి తగిలింది. తర్వాత అతడు అస్వస్థతకు గురవడం వల్ల ఆ స్థానంలో చాహల్ను కంకషన్ సబ్స్టిట్యూట్గా బరిలోకి దించారు. శుక్రవారం కాన్బెర్రా వేదికగా జరిగిన ఈ మ్యాచ్లో టీమ్ఇండియా విజయం సాధించింది. కంకషన్ సబ్స్టిట్యూట్గా వచ్చిన చాహల్ (3/25) మూడు కీలకమైన వికెట్లు పడగొట్టి జట్టు విజయానికి కారణమయ్యాడు.
అయితే కంకషన్ నిర్ణయంపై ఆస్ట్రేలియా మాజీ కెప్టెన్ మార్క్ టేలర్తో పాటు భారత మాజీ క్రికెటర్ సునీల్ గావస్కర్ విమర్శలు చేశారు. మ్యాచ్ జరిగే సమయంలో కంకషన్ సబ్స్టిట్యూట్పై ఆసీస్ ప్రధానకోచ్ జస్టిన్ లాంగర్ అభ్యంతరం వ్యక్తం చేశాడు.
ఇదీ చూడండి:''కంకషన్ సబ్స్టిట్యూట్'ను దుర్వినియోగం చేయొద్దు'
