'కరోనా కారణంగా పుజారా కౌంటీ ఒప్పందం రద్దు'

కరోనా లాక్​డౌన్​ కారణంగా ప్రపంచవ్యాప్తంగా అనేక క్రీడాటోర్నీలు వాయిదా పడ్డాయి. ఈ నేపథ్యంలో ఇంగ్లాండ్​లో జరగాల్సిన కౌంటీ ఛాంపియన్​షిప్​ రద్దయింది. ఈ సందర్భంగా టీమ్​ఇండియా స్పెషలిస్టు చెతేశ్వర్​ పుజారా ప్రదర్శనను మిస్​ అవుతామని ఆ క్లబ్​ ఓ ప్రకటనలో తెలిపింది.

ఏప్రిల్​ 12 నుంచి జరగాల్సిన కౌంటీ ఛాంపియన్‌షిప్‌లో మొదటి ఆరు మ్యాచ్‌లకు గ్లోస్టర్​షైర్​తో టీమ్​ఇండియా టెస్టు స్పెషలిస్టు చెతేశ్వర్​ పుజారా ఒప్పందం కుదుర్చుకున్నాడు. అయితే ప్రపంచవ్యాప్తంగా వేగంగా విస్తరిస్తున్న కరోనా కారణంగా ఈ టోర్నీని రద్దు చేశారు.

ప్రపంచవ్యాప్తంగా విస్తరిస్తున్న సంక్షోభం కారణంగా ఈ ఒప్పందం ముగిసిందని గ్లోస్టర్​షైర్ గురువారం తెలిపింది. మే 28 వరకు జరగాల్సిన అన్ని క్రికెట్​ టోర్నీలను రద్దు చేస్తున్నట్టు తాజాగా ఇంగ్లాండ్​, వేల్స్​ క్రికెట్​ బోర్డు ప్రకటించటమే అందుకు కారణం.

"ఈ ఏడాది చెతేశ్వర్​ పుజారా ఆటను చూసే అవకాశాన్ని మేము కోల్పోయాం. కరోనా కారణంగా మే నెల చివరి వరకు ఎలాంటి టోర్నీలు నిర్వహించడం లేదు. ఈ పరిణామాలతో ప్రతి ఒక్కరు తీవ్రంగా నిరాశ చెందుతారని తెలుసు."

- కౌంటీ ఛాంపియన్​షిప్​ క్లబ్​

పుజారా ఇంతకుముందు ఇంగ్లాండ్‌లోని డెర్బీషైర్, యార్క్‌షైర్, నాటింగ్‌హామ్‌షైర్ తరఫున ఆడాడు. భారత జట్టు తరపున 77 టెస్టులకు ప్రాతినిధ్యం వహించి 48.66 సగటుతో 5,840 పరుగులు చేశాడు.

ఇదీ చూడండి..'ఆ ఎనిమిది నెలలు నరకం అనుభవించా!'