యాషెస్ మూడో టెస్టు తొలి ఇన్నింగ్స్లో ఇంగ్లాండ్ 67 పరుగులకే ఆలౌట్ అయింది. ఈ అంశంపై ఇంగ్లీష్ జట్టు మాజీ ఓపెనర్ జోఫ్రే బాయ్కాట్ ఘాటుగా స్పందించాడు. గురువారం మ్యాచ్లో ఇంగ్లాండ్ ఆటగాళ్లు బుర్రలేని వాళ్లలా బ్యాటింగ్(బ్యాటెడ్ వితౌట్ బ్రెయిన్స్) చేశారంటూ విమర్శించాడు.
"ఇంగ్లాండ్ జట్టుకు ఏమైందో అర్థం కావడం లేదు. ఇలాంటి బ్యాటింగ్తో యాషెస్ సిరీస్ ఎలా నెగ్గుతారు. ఓ రోజు మొత్తం ఆడినా.. ఇంగ్లీష్ జట్టుకు 100 పరుగుల ఆధిక్యం వచ్చేది. కానీ వాళ్లు తెలివి తక్కువతనంగా బ్యాటింగ్ చేసి పెవిలియన్ బాట పట్టారు" -జోఫ్రే బాయ్కాట్, ఇంగ్లాండ్ మాజీ ఓపెనర్.
ప్రపంచకప్లో సత్తాచాటిన జేసన్ రాయ్ ఈ సిరీస్లో ఏమాత్రం ప్రభావం చూపలేకపోయాడని, హజిల్వుడ్ బౌలింగ్లో చెత్తబంతికి స్లిప్లో క్యాచ్ ఇచ్చి వెనుదిరిగాడని తెలిపాడు బాయ్కాట్. రెండో ఇన్నింగ్స్లో ఎన్ని పరుగులు చేస్తాడో తెలియదు కాని, ఇదే బ్యాటింగ్ కొనసాగిస్తే అతడి మెదడును పరీక్షించాలని చెప్పాడు.
మూడో టెస్టులో మొదట బ్యాటింగ్ చేసిన ఆసీస్ 179 పరుగులకు ఆలౌటైంది. అనంతరం బరిలోదిగిన ఇంగ్లాండ్ హజిల్వుడ్(5 వికెట్లు) దెబ్బకు 67 పరుగులకే కుప్పకూలింది. రెండో ఇన్నింగ్స్లో కంగారూ జట్టు 246 పరుగులకు ఆలౌట్ కాగా.. 359 పరుగుల లక్ష్యాన్ని ఛేదించేందుకు ఇంగ్లీష్ జట్టు బరిలో దిగింది.
ఇది చదవండి: ప్రపంచ ఛాంపియన్షిప్: ప్రణీత్కు కాంస్యమే
