టీమ్​ఇండియా కిట్లకు​ స్పాన్సర్​షిప్​ కావలెను!

భారత క్రికెట్​ జట్టు కిట్లకు స్పాన్సర్​షిప్​ కోసం బిడ్స్​ను ఆహ్వానించింది బీసీసీఐ. ఈ ఏడాది సెప్టెంబరు నాటికి నైక్​తో కుదుర్చుకున్న ఒప్పందం ముగియనున్న నేపథ్యంలో ఈ నిర్ణయం తీసుకుంది.

టీమ్​ఇండియా కిట్లకు​ స్పాన్సర్​షిప్​తో పాటు వ్యాపార​ హక్కుల కోసం బీసీసీఐ టెండర్లను ఆహ్వానించింది. గత 14 ఏళ్లుగా నైక్​ సంస్థ భారత జట్టుకు కిట్​ స్పాన్సర్​గా వ్యవహరిస్తోంది. అయితే ఈ ఏడాది సెప్టెంబరుతో ఒప్పందం ముగియనుంది. ఈ నేపథ్యంలో బీసీసీఐ తాజా నిర్ణయం తీసుకుంది. మరోవైపు నైక్​తో ఒప్పందం పునరుద్ధరణకు భారత బోర్డు సిద్ధంగా లేదని అధికారిక వర్గాలు తెలిపాయి.

ఇన్విటేషన్​ టు టెండర్​(ఐటీటీ) ప్రకారం ఈ టెండర్​ను సొంతం చేసుకున్న బిడ్డర్లకు.. కిట్​ స్పాన్సర్​షిప్​తో పాటు మర్చండైజింగ్​ భాగస్వామ్యం, ఇతర అనుబంధ హక్కులు కూడా లభిస్తాయి. ఆసక్తిగల వ్యక్తులు మరిన్ని వివరాలు తెలుసుకునేందుకు marketing@bcci.tvని సంప్రదించాలని బీసీసీఐ తెలిపింది.