మళ్లీ కెప్టెన్​గా స్టార్ క్రికెటర్ స్టీవ్​స్మిత్​

బాల్​ టాంపరింగ్​ వివాదంలో నిషేధం పూర్తయిన తర్వాత, మొదటిసారిగా కెప్టెన్సీ బాధ్యతలు అందుకోనున్నాడు స్టీవ్​ స్మిత్​. జులైలో ప్రారంభమయ్యే ఈ ది హండ్రెడ్​ క్రికెట్​ లీగ్​లోని ఓ జట్టుకు సారథిగా వ్యవహరించనున్నాడు.

2018లో బాల్ ​టాంపరింగ్​ వివాదం కారణంగా ఏడాది పాటు నిషేధానికి గురయ్యారు ఆస్ట్రేలియాకు చెందిన స్టీవ్​ స్మిత్​, డేవిడ్​ వార్నర్. దీనితోపాటే స్మిత్​.. రెండేళ్ల పాటు కెప్టెన్సీ పదవి చేపట్టడానికి వీల్లేదని క్రికెట్ ఆస్ట్రేలియా(సీఏ) ఆదేశించింది. ఈ ఘటన జరిగి రెండేళ్లు పూర్తయిన క్రమంలో స్మిత్​.. మరోసారి కెప్టెన్సీ బాధ్యతలను చేపట్టనున్నాడు. ఇప్పుడు ఈ విషయంపై స్పందించాడీ బ్యాట్స్​మన్.

''ది హండ్రెడ్​​' క్రికెట్​ లీగ్ ప్రారంభమైన తొలి ఏడాదే వెల్ష్​ ఫైర్​ జట్టుకు నాయకత్వం వహించే అవకాశం రావటం నాకు దక్కిన గౌరవంగా భావిస్తాను" - స్టీవ్​ స్మిత్​, ఆస్ట్రేలియా క్రికెటర్

'ది హండ్రెడ్‌' అనేది వంద బంతుల క్రికెట్‌ లీగ్‌. ఇంగ్లాండ్‌, వేల్స్‌ క్రికెట్‌ బోర్డు.. ఈ టోర్నీని నిర్వహిస్తున్నాయి. ఈ ఏడాది జులై 17న తొలి సీజన్‌ మొదలు కానుంది. ఇందులో మొత్తం ఎనిమిది ఫ్రాంచైజీలు ఉండగా, ప్రతి జట్టుకు ముగ్గురు మాత్రమే విదేశీ ఆటగాళ్లను అనుమతించారు.

ఇదీ చూడండి.. కంబళ వీరుడు శ్రీనివాసగౌడకు బెంగళూరులో శిక్షణ