Ashes Proposal: యాషెస్ సిరీస్లో భాగంగా ఆస్ట్రేలియా-ఇంగ్లాండ్ మధ్య తొలి టెస్టు రసవత్తరంగా సాగుతోంది. ఇరుజట్లు ఒకరిపై ఒకరు ఆధిపత్యం చెలాయిస్తున్నాయి. ఇలాంటి పరిస్థితుల్లో ఈ మ్యాచ్ చూస్తున్న వీక్షకుల స్టాండ్లో ఓ ఆసక్తికర సన్నివేశం చోటుచేసుకుంది. ఓ ఇంగ్లాండ్ ఫ్యాన్, ఆస్ట్రేలియా అభిమానికి ప్రపోజ్ చేశాడు. దీంతో అక్కడి వాతావారణం ఒక్కసారిగా ఆహ్లాదకరంగా మారిపోయింది. ఆమె కూడా ఓకే చెప్పడం వల్ల స్టేడియమంతా అరుపులు, కేకలతో నిండిపోయింది.
ఇంగ్లాండ్లోని ఫేమస్ బర్మీ ఆర్మీ(ఇంగ్లాండ్ క్రికెట్ జట్టు అభిమానుల సమూహం)కి చెందిన రాబ్ హేల్ ఆస్ట్రేలియాకు చెందిన నటాలియాకు స్టాండ్స్లోనే ప్రపోజ్ చేశాడు. రింగ్ చూపించి తన ప్రేమను వ్యక్తపరిచాడు. ఇది చూసిన నటాలియా ఒక్కసారిగా షాక్కు గురైంది. తర్వాత తేరుకుని అతడిని కౌగిలిలో బంధించి ముద్దుల్లో ముంచెత్తింది. ఇది కాస్తా కెమెరాల్లో రికార్డు కావడం వల్ల ప్రస్తుతం ఈ వీడియో నెట్టింట చక్కర్లు కొడుతోంది. అలాగే ఈ సన్నివేశాన్ని బర్మీ ఆర్మీ కూడా ట్వీట్ చేసింది. "వారిద్దరూ 2017లో జరిగిన యాషెస్లో కలుసుకున్నారు. ఈ యాషెస్లో ఒక్కటయ్యారు" అంటూ వారికి శుభాకాంక్షలు తెలిపింది.