మెస్సీ@1000.. అరుదైన ఘనత సొంతం చేసుకున్న ఫుట్‌బాల్‌ హీరో

లియోనల్‌ మెస్సీ ఫుట్‌బాల్‌ ప్రపంచంలో అతనో హీరో. అతడి పాదాల మధ్య బంతి పాదరసంలా జారుతుంది. మైదానంలో అతడి వేగం చిరుతను తలపిస్తుంది. గోల్‌ కొడితే బంతి లక్ష్యాన్ని ముద్దాడుతుంది. అసమాన ఆటతీరుతో రికార్డులను నెలకొల్పడం అభిమానులను మంత్రముగ్ధులను చేయడం మెస్సీకి ఫుట్‌బాల్‌తో పెట్టిన విద్య. మెస్సీ ఇప్పుడు మరో అరుదైన ఘనత సొంతం చేసుకున్నాడు.

దశాబ్దకాలానికిపైగా ప్రపంచ ఫుట్‌బాల్ ప్రేమికులను మైమరిపిస్తున్న ఆటగాడు లియోనల్ మెస్సీ.. తన అద్భుత ఆటతో ప్రపంచాన్ని మైమరిపించిన ఈ అర్జెంటీనా స్టార్.. మరో అరుదైన మైలురాయిని అందుకున్నాడు. కెరీర్‌లో వెయ్యి మ్యాచ్‌లు పూర్తి చేసుకున్న ఆటగాడిగా ఖ్యాతినార్జించాడు. ఖతార్‌లో జరుగుతున్న ఫిఫా ప్రపంచకప్‌లో ఆస్ట్రేలియాతో జరిగిన మ్యాచ్‌ మెస్సీకి వెయ్యో మ్యాచ్‌.

ఈ మ్యాచ్‌లో కళ్లు చెదిరే గోల్‌తో ఆకట్టుకున్న మెస్సీ.. ఫుట్‌బాల్‌ దిగ్గజం డీగో మారడోనా రికార్డును కూడా బద్దలుకొట్టాడు. ఈ టోర్నీలో ఇప్పటి వరకు మెస్సీ 3 గోల్స్‌ సాధించాడు. దీంతో అతడి కెరీర్‌లో ఫిఫా ప్రపంచకప్‌లలో కొట్టిన మొత్తం గోల్స్‌ సంఖ్య 9కి చేరింది. అర్జెంటీనా తరఫున ప్రపంచకప్‌లో అత్యధిక గోల్స్‌ చేసిన ఆటగాళ్లలో మెస్సీ రెండో స్థానానికి చేరుకొన్నాడు. ఫుట్‌బాల్‌ దిగ్గజం డీగో మారడోనాను మెస్సీ అధిగమించాడు. అర్జెంటీనా తరపున ఫీఫా కప్‌లో అత్యధిక గోల్స్‌ చేసిన వారిలో గాబ్రియెల్‌ బటిస్టుటా 10 గోల్స్‌తో అగ్రస్థానంలో ఉన్నాడు.

పోర్చుగల్‌ ఆటగాడు క్రిస్టియానో రొనాల్డో కంటే మెస్సీ మెరుగైన రికార్డు సాధించాడు. వీరిద్దరిలో ఎవరు ఉత్తమ ఆటగాడు అనే చర్చ ఎప్పుడూ జరుగుతూ ఉంటుంది. రొనాల్డో తన 1000వ అంతర్జాతీయ మ్యాచ్‌ను 2020లో పూర్తి చేశాడు. ఈ క్రమంలో అతడు 725 గోల్స్ చేయగా మరో 216 గోల్స్‌ చేసేందుకు సహకరించాడు. ఇక మెస్సీ అంతర్జాతీయ కెరీర్‌లో 1000వ మ్యాచ్‌ను తాజాగా ఆస్ట్రేలియాతో ఆడాడు. తన కెరీర్‌లో మొత్తం 789 గోల్స్‌ చేయగా 348 గోల్స్‌కు సహకారం అందించాడు. రొనాల్డో ఖాతాలో 31 ట్రోఫీలు.. మెస్సీ వద్ద 41 ఉన్నాయి. రికార్డుల పరంగా రొనాల్డో కంటే మెస్సీ చాలా మెరుగ్గా ఉన్నాడు.

ఇవీ చదవండి:'బంగ్లా టీమ్​తో సిరీస్​ అంత ఈజీ కాదు.. ఆ విషయం ఇప్పుడే చెప్పలేం'