Sri Lanka Vs Zimbabwe : భారత్ ఆతిథ్యమిస్తున్న ఐసీసీ వన్డే వరల్డ్ కప్ 2023కు శ్రీలంక జట్టు అర్హత సాధించింది. ప్రపంచ కప్ 2023 క్వాలిఫైయర్స్ సూపర్ సిక్సెస్ స్టేజ్లో భాగంగా జింబాబ్వేతో జరిగిన మ్యాచ్లో 9 వికెట్ల తేడాతో శ్రీలంక జట్టు ఘన విజయం సాధించింది. దీంతో 8 పాయింట్లు సాధించిన శ్రీలంక.. మరో మ్యాచ్ మిగిలి ఉండగానే వరల్డ్ కప్నకు నేరుగా అర్హత సాధించి.. వరల్డ్ కప్లో 9వ జట్టుగా అడుగుపెట్టింది. మరోవైపు, వరల్డ్ కప్ రేసు నుంచి జింబాబ్వే నిష్క్రమించింది.
ఇక మ్యాచ్ విషయానికి వస్తే.. తొలుత బ్యాటింగ్కు దిగిన జింబాబ్వే జట్టు.. 32.2 ఓవర్లలో 165 పరుగులు చేసి ఆలౌటైంది. జింబాబ్వే బ్యాటర్లలో సీన్ విలియమ్స్‌..57 బంతుల్లో 56 స్కోర్ చేసి మైదానంలో చెలరేగిపోయాడు. శ్రీలంక బౌలర్లలో మహీశ్ తీక్షణ 4 వికెట్లతో రాణించగా.. మదుషంక 3 వికెట్లు, పతిరణ 2 వికెట్లు సాధించి టీమ్కు గెలుపును అందించడంలో కీలక పాత్ర పోషించారు.
మరోవైపు 166 పరుగుల లక్ష్యంతో బరిలోకి దిగిన శ్రీలంక.. 33.1 ఓవర్లలో కేవలం ఒక్క వికెట్ మాత్రమే నష్టపోయి అనుకున్న స్కోర్ను ఛేదించి అనూహ్య విజయాన్ని సాధించింది. లంక బ్యాటర్లలో ఓపెనర్ నిస్సంక(101) అజేయ శతకంతో చెలరేగగా.. అతడితో పాటు కరుణరత్నే(30) కూడా ఈ మ్యాచ్లో రాణించాడు.
ICC World Cup 2023 Schedule : అక్టోబర్‌ 5వ తేదీ నుంచి వరల్డ్ కప్ మ్యాచ్లు ప్రారంభం కానున్నాయి. నవంబర్‌ 19 వరకు ఈ మ్యాచ్లు జరగనున్నాయి. 46 రోజుల పాటు ఈ టోర్నీలో మొత్తం 10 వేదికల్లో మ్యాచ్లు నిర్వహించనున్నారు. మొత్తం 10 జట్లు టైటిల్‌ కోసం పోటీపడనున్నాయి. ఇప్పటికే 8 జట్లు నేరుగా టోర్నీకి అర్హత సాధించాయి. తాజాగా 9వ టీమ్గా అర్హత సాధించింది. లీగ్‌ దశలో ప్రతి జట్టు మిగిలిన తొమ్మిది జట్లతో రౌండ్‌ బిన్‌ పద్ధతిలో ఒక్కో మ్యాచ్ ఆడనుంది. ఈ క్రమంలో సెమీఫైనల్స్‌కు పాయింట్ల పట్టికలో టాప్‌-4లో నిలిచిన జట్లు అర్హత సాధిస్తాయి.
Icc world Cup Schedule : అక్టోబర్‌ 8న అస్ట్రేలియాతో భారత్.. చెన్నై వేదికగా తన తొలి మ్యాచ్ ఆడనుంది. ఇక అహ్మదాబాద్‌ వేదికగా అక్టోబర్‌ 15న భారత్-పాక్తో తలపడనుంది. మరోవైపు లీగ్‌ దశలో టీమ్‌ఇండియా మొత్తం 8 మ్యాచ్లు ఆడనుంది. నవంబర్‌ 15, 16న ముంబయి, కోల్‌కతా వేదికగా సెమీ ఫైనల్‌ మ్యాచ్లు జరగ్గా.. అహ్మదాబాద్‌ వేదికగా నవంబర్‌ 19న ఫైనల్‌ మ్యాచ్ ఉండనుంది. హైదరాబాద్‌ వేదికగా 3 ప్రపంచకప్‌ మ్యాచ్లు జరగనున్నాయి.
