వరల్డ్ టూర్ ఫైనల్స్ను విజయంతో ముగించింది భారత షట్లర్ పీవీ సింధు. శుక్రవారం జరిగిన గ్రూప్ దశ ఆఖరి మ్యాచ్లో థాయ్లాండ్ స్టార్ షట్లర్ చోచువాంగ్ను వరుస సెట్లలో ఓడించింది. అయినప్పటికీ తొలి రెండు మ్యాచ్లలో ఓడిన సింధు.. టోర్నీ నుంచి నిష్క్రమించక తప్పదు.
ఎట్టకేలకు ఫామ్లో..
మూడో మ్యాచ్లో తొలి సెట్ హోరాహోరీగా సాగింది. చోచువాంగ్, సింధు మధ్య ఆధిక్యం దోబూచులాడింది. అయితే తన అత్యున్నత ఫామ్ అందుకున్న సింధు.. పైచేయి సాధించింది. ఆ గేమ్ను 21-18తో దక్కించుకుంది. ఇక రెండో సెట్లో తొలి నుంచి ఆధిపత్యం ప్రదర్శించిన సింధు.. 21-15తో మ్యాచ్ గెలిచింది.
అయితే ఈ ఓటమితో చోచువాంగ్కు పెద్దగా నష్టం లేదు. ఆమె ఇప్పటికే రెండు మ్యాచ్లు గెలిచి సెమీస్కు అర్హత సాధించింది.
ముగిసిన కథ..
బుధవారం తొలి మ్యాచ్లో తైజు ఇంగ్ చేతిలో, గురువారం రెండో మ్యాచ్లో రచనోక్ చేతిలో సింధు ఓడిపోయింది. మరోవైపు పురుషుల సింగిల్స్లోనూ భారత షట్లర్ కిదాంబి శ్రీకాంత్ టోర్నీ నుంచి శుక్రవారం నిష్క్రమించాడు. అతడు గ్రూప్ దశ మూడు మ్యాచుల్లోనూ ఓటమి చవిచూశాడు. డబ్ల్యూటీఎఫ్ టోర్నీకి అర్హత సాధించిన భారత షట్లర్లు వీరిద్దరు మాత్రమే. వారి నిష్క్రమణతో టోర్నీలో భారత్ ప్రస్థానం ముగిసింది.
ఇదీ చూడండి:వారంలోనే రెండో 'థాయ్' టైటిల్ గెలిచిన కరోలినా
