హాంకాంగ్ ఓపెన్​లో సింధు, ప్రణయ్ శుభారంభం

హాంకాంగ్ ఓపెన్​లో భారత షట్లర్లు పీవీ సింధు, హెచ్​ఎస్ ప్రణయ్​ శుభారంభం చేశారు. కొరియాకు చెందిన కిమ్​పై సింధు గెలవగా.. చైనా క్రీడాకారుడు హువాంగ్​​ యు జియాంగ్​ను ప్రణయ్ ఓడించాడు.

ఫ్రెంచ్, చైనా ఓపెన్​లో ఆరంభంలోనే ఇంటిముఖం పట్టిన పీవీ సింధు హాంకాంగ్ ఓపెన్​లో సత్తా చాటింది. మహిళల సింగిల్స్ విభాగంలో తొలి రౌండ్​లో కొరియాకు చెందిన 'కిమ్​ గా యున్​'ను ఓడించి రెండో రౌండ్​కు చేరింది.

బుధవారం జరిగిన ఈ మ్యాచ్​లో ప్రపంచ 19వ ర్యాంకర్​ కిమ్​పై 21-15, 21-16 తేడాతో వరుస సెట్లలో విజయం సాధించింది సింధు. కేవలం 36 నిమిషాల్లోనే మ్యాచ్​ను ముగించింది. రెండు సెట్లల్లోనూ ప్రత్యర్థిపై ఆధిపత్యం చెలాయించి గేమ్​ను సొంతం చేసుకుంది.

పురుషుల సింగిల్స్​లో చైనాకు చెందిన హువాంగ్​ యు జియాంగ్​పై ప్రణయ్ విజయం సాధించాడు. 21-17, 21-17 తేడాతో వరుస సెట్లలో గెలుపొందాడు. 44 నిమిషాల్లో మ్యాచ్​ను ముగించి రెండో రౌండ్​కు చేరాడు. రెండు సెట్లలోనూ మెరుగ్గా రాణించాడు ప్రణయ్.

ప్రణయ్​

ఇప్పటికే భారత స్టార్ షట్లర్లు సైనా నెహ్వాల్, సమీర్ వర్మ తొలి రౌండ్లోనే నిష్క్రమించారు. చైనాకు చెందిన కై చేతిలో సైనా పరాజయం చెందగా.. చైనీస్ తైపీ ప్లేయర్ వాంగ్​పై సమీర్ ఓడాడు.

ఇదీ చదవండి: రోహిత్​శర్మ '264' మైలురాయికి ఐదేళ్లు