ఔట్​డోర్ షటిల్​కు జైకొట్టిన దిగ్గజ ఆటగాళ్లు

ప్రపంచ బ్యాడ్మింటన్ ఫెడరేషన్​ తాజాగా ఆవిష్కరించిన ఎయిర్ ​బ్యాడ్మింటన్​ ఫార్మాట్​కు భారత షట్లర్లు సుముఖత వ్యక్తం చేస్తున్నారు. ఔట్​డోర్, ఇన్​డోర్ బ్యాడ్మింటన్​ ఫార్మాట్​ల మధ్య పెద్ద తేడా లేదని భారత స్టార్ షట్లర్ సైనా నెహ్వాల్ అభిప్రాయపడింది.

ఔట్​డోర్ బ్యాడ్మింటన్​కు(ఎయిర్ బ్యాడ్మింటన్) భారత షట్లర్లు సుముఖత వ్యక్తం చేస్తున్నారు. భారత స్టార్ సైనా నెహ్వాల్​ సహా చాలామంది ఈ ఫార్మాట్​పై సానుకూలంగా స్పందిస్తున్నారు. రిటైరైన క్రీడాకారులు ఎయిర్​ బ్యాడ్మింటన్​ను ప్రత్యామ్నాయ కెరీర్​గా ఎంచుకోవచ్చని అభిప్రాయపడుతున్నారు.

"మనదేశంలో చాలామంది బ్యాడ్మింటన్​ను ఔట్​డోర్​లోనే ఆడుతున్నారు. మేము కూడా కుటుంబంతో కలిసి ఆరుబయట షటిల్​ ఆడినవాళ్లమే. ప్రపంచ బ్యాడ్మింటన్ ఫెడరేషన్(బీడబ్ల్యూఎఫ్​) ఈ ఫార్మాట్​ను తీసుకొచ్చి గొప్ప ముందడుగేసింది". -సైనా నెహ్వాల్, భారత స్టార్ షట్లర్.

ఈ ఫార్మాట్​తో బ్యాడ్మింటన్​కు ఆదరణ పెరుగుతుందని, చాలా మంది క్రీడాకారులకు అవకాశం దొరుకుతుందని సైనా అభిప్రాయపడింది. ఇన్​డోర్, ఔట్​డోర్​ విధానాల మధ్య పెద్ద తేడా లేదని తెలిపింది. గాలి, తేమ లాంటి కొన్ని మార్పులే ఉన్నాయని చెప్పింది.

ఎయిర్​బ్యాడ్మింటన్​ను ప్రపంచ బ్యాడ్మింటన్ ఫెడరేషన్(బీడబ్ల్యూఎఫ్) గత వారం చైనాలోని గ్వాంగ్జౌలో ఆవిష్కరించిన సంగతి తెలిసిందే.