ఆలియాభట్‌... సినిమా రంగంలోకి వచ్చిన అతి తక్కువ సమయంలోనే తనకంటూ గుర్తింపు తెచ్చుకున్న అందాల నాయిక. త్వరలో ‘ఆర్‌ఆర్‌ఆర్‌’ తో తెలుగులోనూ తెరంగేట్రం చేయబోతున్న ఈ బాలీవుడ్ భామ ఇష్టాయిష్టాలేంటంటే...
మరచిపోలేని జ్ఞాపకం
నేను జమ్నాబాయ్‌ నర్సీ స్కూల్లో చదువుకున్నా. ఏ క్లాస్‌లో ఉన్నప్పుడో గుర్తులేదు కానీ... చిన్నప్పుడు రోజూ స్కూలుకెళ్లి బాత్రూంలో నిద్రపోయేదాన్ని. ఓ రోజు టీచరు చూసి.. వారంరోజుల పాటు క్లాసులోని బెంచీలన్నింటినీ తుడవమని పనిష్మెంట్‌ ఇచ్చారు. ఆ సమయంలో అది చాలా ఇబ్బందికరంగా అనిపించింది కానీ... ఇప్పుడు తలచుకుంటే నవ్వొస్తుంది.
పెరుగు ఉండాల్సిందే
చేపలు, రాగి చిప్స్‌, ఫ్రెంచ్‌ఫ్రైస్‌, రసగుల్లా, పెరుగన్నం, పెసరపప్పు హల్వా... ఇలా చాలా పదార్థాలు ఇష్టంగా లాగించేస్తా. ఏవి ఉన్నా లేకపోయినా భోజనంలో మాత్రం పెరుగు కచ్చితంగా ఉండాల్సిందే. అది లేకపోతే భోజనం పూర్తయినట్లు అనిపించదు.
ఇష్టపడే పెంపుడు జంతువు
మొదటినుంచీ నాకు పిల్లులంటే ఇష్టం. నేను పెంచుకునే పిల్లి పేరు ఎడ్వర్డ్‌. ఆ ఇష్టంతోనే పెటా నిర్వహించే అవగాహన కార్యక్రమాల్లో పాల్గొన్నా.
నిద్రంటే...
నిద్రపోవడమంటే చెప్పలేనంత ఇష్టం. అవకాశం వస్తే.. దాదాపు పన్నెండు నుంచి పద్నాలుగు గంటలపాటు హాయిగా నిద్రపోతా. అయితే నాకు చీకటంటే భయం. అందుకే రాత్రుళ్లు కూడా నా బెడ్‌రూంలో లైటు వెలుగుతుంటుంది.