కోలీవుడ్ రియల్‌ కపుల్ నయనతార ఆమె ప్రియుడు విఘ్నేశ్ శివన్, టాలీవుడ్‌ రీల్ కపుల్ విజయ్ దేవరకొండ-రష్మిక.. వీళ్ల గురించే ఇప్పుడు అందరూ మాట్లాడుకుంటున్నారు. ఒకవైపు నయన్‌-విఘ్నేశ్ ఓ లవ్లీ పిక్‌తో ఆశ్చర్యపర్చగా.. మరోవైపు విజయ్-రష్మికల పార్టీ ఫొటోలు ప్రతి ఒక్కర్నీ ఆకట్టుకుంటున్నాయి. దీంతో ఇప్పుడు ఈ జంటల ఫొటోలు ప్రస్తుతం నెట్టింట్లో వైరల్గా మారాయి.
ఎంగేజ్‌మెంటా?కాదా?
నయన్‌, దర్శకుడు విఘ్నేశ్ శివన్ ఎంతోకాలం నుంచి ప్రేమలో ఉన్నారనేది ఓ బహిరంగ రహస్యం. ఒకానొక సమయంలో ప్రేమలో విఫలమైన నయన్‌కు 'నేను రౌడీ నే' సమయంలో విఘ్నేశ్‌తో పరిచయం ఏర్పడింది. అనంతరం వీరి పరిచయం ప్రేమకు దారితీసింది. నయన్‌పై తనకున్న ప్రేమను విఘ్నేశ్ పలు సందర్భాల్లో సోషల్‌మీడియా వేదికగా తెలియజేశాడు. ఇప్పుడు ఆయన ఇన్‌స్టాలో ఓ ఫొటో షేర్ చేశారు. అందులో నయన్‌ చేతికి ఉన్న ఉంగరం చూసి.. ఈ జంటకు నిశ్చితార్థమైందని అందరూ భావించారు. కంగ్రాట్స్‌ చెబుతూ కామెంట్లూ పెడుతున్నారు. అయితే, నయన్‌ వేలికి ఉన్న ఆ ఉంగరం.. గతేడాది విఘ్నేశ్ షేర్ చేసిన చాలా ఫొటోల్లో కనిపించింది. దీంతో ఈ జంటకు నిశ్చితార్థమైందా?లేదా? అని నెట్టింట చర్చ నడుస్తోంది.