క్యారెక్టర్‌ ఆర్టిస్ట్‌గా మెప్పించి 'పెళ్లిచూపులు' చిత్రంతో హీరోయిన్గా తనకంటూ ప్రత్యేకమైన గుర్తింపు తెచ్చుకున్న భామ రీతూవర్మ. ఈ సినిమా విడుదలైన తర్వాత ఇక్కడి ప్రేక్షకులకు ఎంతో చేరువయ్యారు. ప్రస్తుతం విభిన్నమైన పాత్రల్లో నటిస్తూ తెలుగు, తమిళ ఇండస్ట్రీలో దూసుకెళ్తోన్న రీతూవర్మ నటించిన కొత్త చిత్రం 'టక్ జగదీష్'. నాని కథానాయకుడిగా నటించిన ఈ సినిమా మరికొన్ని రోజుల్లో ప్రేక్షకుల ముందుకు రానుంది. ఈ సందర్భంగా ఆమె విలేకర్లకు ఇంటర్వ్యూ ఇచ్చారు. ఆ విశేషాలివే..
మొట్టమొదటిసారి ఇలా..
కెరీర్‌ ప్రారంభించినప్పటి నుంచి ఇప్పటివరకూ 11 సినిమాలు చేశాను. మొత్తంగా 11 విభిన్నమైన పాత్రల్లో నటించాను. మొట్టమొదటిసారి 'టక్ జగదీష్' వంటి పూర్తిస్థాయి కమర్షియల్‌ చిత్రంలో నటించాను. ఇందులో నా పాత్ర పేరు గుమ్మడి వరలక్ష్మి. వీఆర్వోగా పనిచేస్తుంటాను. గ్రామీణ యువతిని కావడం వల్ల ఓ వైపు సంప్రదాయాలకు విలువనిస్తూనే మరోవైపు నా మనసు చెప్పిందే ధైర్యంగా చేస్తుంటాను.
కొంచెం బాధగా ఉంది..!
‘టక్ జగదీష్’.. కమర్షియల్‌ హంగులకు ఏ మాత్రం తీసిపోని ఓ కుటుంబ కథా చిత్రం. ఈ సినిమా థియేటర్ల కోసమే రూపొందించాం. కాకపోతే కరోనా కారణంగా ఏర్పడిన పరిస్థితులను దృష్టిలో ఉంచుకుని ఓటీటీ రిలీజ్‌కు నిర్మాతలు అంగీకరించారు. అలా, మా సినిమా ఓటీటీ బాటపట్టింది. థియేటర్‌లో సినిమా విడుదల కానందుకు నాకు కొంత బాధగా ఉంది. కానీ తప్పదు. ఇప్పుడు ఉన్న రోజుల్లో ఓటీటీకి కూడా ఆదరణ పెరిగింది. దానివల్ల మా సినిమా అతి తక్కువ సమయంలోనే ఎక్కువమందికి చేరుతుందని మేము నమ్ముతున్నాం.
నేను తెలుగమ్మాయిని కాదు..!
నిజం చెప్పాలంటే నేను పూర్తిస్థాయి తెలుగమ్మాయిని కాదు. మా కుటుంబం ఉత్తరాదికి చెందినది. ఇటు వలస వచ్చేశారు. నేను పుట్టింది పెరిగింది ఇక్కడే. దానివల్లే అందరూ నన్ను తెలుగమ్మాయిగా భావిస్తున్నారు. ఇక్కడ వాళ్లు ఎంతో ఫ్రెండ్లీగా ఉంటారు.
గ్లామర్‌కు నో అని కాదు..!
ఒక నటిగా నాకు అన్నిరకాల పాత్రలు చేయాలని ఉంది. అందుకు అనుగుణంగానే విభిన్నమైన పాత్రలు స్వీకరిస్తున్నాను. వాటిల్లో నాకు నచ్చినవే ఓకే చేస్తున్నాను. 'పెళ్లి చూపులు' తర్వాత కూడా అదే తరహా కథలు నా వద్దకు వచ్చాయి. కాకపోతే నేను వాటికి అంగీకారం తెలుపలేదు. ఆ సినిమా తర్వాతే నాకు తమిళంలోనూ మంచి పేరు వచ్చింది. ఇప్పటివరకూ చేసిన సినిమాల పట్ల ఆనందంగా ఉంది. ఎలాంటి విచారం లేదు. అంతేకాకుండా గ్లామర్ పాత్రలు చేయకూడదని ఏమీ లేదు. నా వద్దకు వచ్చిన పాత్రల్లో నాకు బాగా నచ్చివని మాత్రమే ఎంచుకుంటున్నాను.
దర్శకుల నటి..!