Tollywood Heroines in Item songs: సుకుమార్ దర్శకత్వంలో అల్లు అర్జున్ హీరోగా తెరకెక్కిన సినిమా 'పుష్ప'. తాజాగా ఈ చిత్రంలోని 'ఊ అంటా మావ ఉఊ అంటావా మావ' అంటూ సాగే ప్రత్యేక గీతం విడుదలైంది. ఈ గీతానికి స్టార్ హీరోయిన్ సమంత కాలు కదిపి సినీప్రియుల చూపులను తనవైపు తిప్పుకుంది. ప్రస్తుతం ఈ సాంగ్ కుర్రకారులను విపరీతంగా ఊపేస్తోంది. ఎక్కడ చూసిన ఇదే వినిపిస్తోంది. సోషల్మీడియాలోనూ ఈ పాటే ట్రెండింగ్ అవుతోంది. అయితే సమంత కన్నా ముందే పలువురు ప్రముఖ కథానాయికలు కూడా ప్రత్యేక గీతంలో ఆడిపాడి అభిమానుల్ని అలరించారు.
గతంలో స్పెషల్ సాంగ్స్(ఐటెమ్ సాంగ్స్) కోసం కొంతమంది ప్రత్యేకంగా ఆర్టిస్ట్లు ఉండేవాళ్లు. సిల్క్స్మిత, జయమాలిని సహా పలువురు అలనాటి తారలు ఈ ప్రత్యేక గీతాల్లో చిందులేసేవారు. ఆ తర్వాత ముమైత్ ఖాన్ సహా ఇంకొంతమంది వరకు ఈ ట్రెండ్ కొనసాగింది. అనంతరం తమ ఫేమ్ తగ్గిన తర్వాత రాశీ, రంభలాంటి వారు స్పెషల్ సాంగ్స్ చేశారు. కానీ ఆ తర్వాత క్రమక్రమంగా రూట్ మారింది. ఫామ్లో ఉన్నప్పుడే స్టార్ హీరోయిన్లు ఇలాంటివి చేసేందుకు ఆసక్తి చూపడం ప్రారంభించారు. బాలీవుడ్లో కరీనాకపూర్, కత్రినా కైఫ్ లాంటి టాప్ హీరోయిన్స్తో మొదలైన ఈ కొత్త ట్రెండ్ టాలీవుడ్లోనూ కొనసాగింది. శ్రియ, తమన్నా, శ్రుతిహాసన్, కాజల్ ఇలా పలువురు భామలు తమ అందాలను మరింత హాట్గా చూపిస్తూ ఐటెం సాంగ్స్లో కనపడి సినీప్రియుల్ని కట్టిపడేశారు. ఇంకా ఈ జాబితాలో ఎవరెవరు ఉన్నారు? ఏ పాటలకు కాలు కదిపారు? తెలుసుకుందాం..
హీరోయిన్గా ఫామ్లో ఉండగానే స్పెషల్ సాంగ్స్లో చిందులేసే ట్రెండ్ శ్రియతోనే మొదలైందని చెప్పాలి. రామ్ హీరోగా నటించిన దేవదాసు చిత్రంలో జామ్ జికిడి పాటతో అలరించిందీ భామ. ఈ సాంగ్ అప్పట్లో కుర్రోళ్లను ఉర్రూతలూగించింది. ఆ తర్వాత 'మున్నా', 'తులసి', 'పులి' సహా పలు చిత్రాల్లో చేసింది.