సినిమాల్లో నటించడమే కాకుండా రకరకాల వ్యాపారాల్లోనూ రాణిస్తూ రెండు చేతులా సంపాదిస్తున్నారు కొంతమంది టాలీవుడ్ హీరోలు. అటు నటనతో పాటు బిజినెస్లోనూ దండిగా ఆర్జిస్తున్నారు. మెగాస్టార్ చిరంజీవి దగ్గర్నుంచి యువ హీరో సందీప్ కిషన్ వరకు ఎంతోమంది అనేక వ్యాపారాల్లో అడుగుపెట్టి లాభాలను గడిస్తున్నారు. ఈ క్రమంలో ఆ హీరోలు ఎవరు? వారు చేసే బిజినెస్ ఏమిటో తెలుసుకుందామా.
మహేశ్ బాబు
హీరోలుగా చిత్రసీమలో సినిమాలు చేస్తూ బిజినెస్మ్యాన్గా రాణించిన వారి జాబితాలో సూపర్స్టార్ మహేశ్బాబు అగ్రస్థానంలో ఉంటారు. చిత్రాల నిర్మాణరంగంలో అడుగుపెట్టడం సహా ఇటీవలే హైదరాబాద్లో ఏఎమ్బీ మల్టీప్లెక్స్ను నడుపుతున్నారు. వీటికి తోడు ఓ దుస్తుల బ్రాండ్తో పాటు పలు బ్రాండ్లకు ప్రచారకర్తగా వ్యవహరిస్తూ.. రెండు చేతులా సంపాదిస్తున్నారు. ఈ విషయంలో ఆయన సతీమణి నమ్రత కూడా మహేశ్కు సాయంగా ఉంటోంది.
చిరంజీవి
చిత్రసీమలో అడుగుపెట్టిన తొలినాళ్ల నుంచి నటనపై దృష్టి పెట్టిన మెగాస్టార్ చిరంజీవి.. ప్రస్తుతం వ్యాపారం వైపు మొగ్గు చూపారు. దిగ్గజ క్రికెటర్ సచిన్ తెందూల్కర్తో కలిసి ఇండియన్ సూపర్లీగ్లో కేరళ బ్లాస్టర్స్ టీమ్కు సహ యజమానిగా ఉన్నారు.
రామ్చరణ్
నటనలో తండ్రికి తగ్గ తనయుడిగా పేరు తెచ్చుకున్న మెగా పవర్స్టార్ రామ్చరణ్.. వ్యాపార రంగంలోనూ అడుగుపెట్టారు. టాలీవుడ్లో పలు చిత్రాలను నిర్మించడం సహా ఓ విమాన సంస్థలో భాగమయ్యారు. వీటితో పాటు పోలో అనే క్రీడలోనూ అడుగుపెట్టినట్లు టాలీవుడ్ వర్గాలు అంటున్నాయి.
అక్కినేని నాగార్జున
చిత్రసీమలో హీరోగా, నిర్మాతగానూ రాణిస్తున్నారు అక్కినేని నాగార్జున. ఇంతకుముందు ఓ ప్రైవేట్ ఛానెల్లో కొన్నేళ్లపాటు భాగస్వామిగా కొనసాగారు. ప్రస్తుతం ఆయన ఓ రేసింగ్ కంపెనీతో పాటు ఇండియన్ సూపర్లీగ్లోని ఓ ఫుట్బాల్ టీమ్కు సహ యజమానిగా వ్యవహరిస్తున్నారు.