సుశాంత్ సింగ్ రాజ్పుత్కు ఉత్తమ నటుడిగా ఆస్కార్ సొంతం చేసుకునే ప్రతిభ ఉందని బాలీవుడ్ నటి సెలీనా జైట్లి అన్నారు. సుశాంత్ మరణానికి సంతాపం తెలిపిన ఈమె.. సినీ పరిశ్రమ గొప్ప టాలెంట్ను కోల్పోయిందని పేర్కొన్నారు. అతనికి అపారమైన సామర్థ్యం ఉందని ప్రశంసించారు.
"ఒక గొప్ప ప్రతిభను కోల్పోవడం నిజంగా చాలా బాధాకరం. కేవలం ఒక తండ్రి, సోదరుడు, ప్రియమైన వారికే కాకుండా, సినీ పరిశ్రమకూ తీరని నష్టం వాటిల్లింది. భవిష్యత్తులో భారత్ నుంచి తొలి ఆస్కార్(ఉత్తమ నడుడిగా) గెలుచుకోదగిన అపారమైన నటనా సామర్థ్యం సుశాంత్లో దాగి ఉంది. అది ఎప్పటికీ మీకు తెలియదు."
-సెలీనా జైట్లి, బాలీవుడ్ నటి
సుశాంత్ చనిపోవడానికి మానసిక ఒత్తిడే కారణమని పోలీసులు తెలిపారు. ఈ విషయంపై సెలీనా స్పందిస్తూ... "డిప్రెషన్ అనేది ఒక వ్యాధి. మనం విజయాలు సాధించినా, ధనవంతులైనా, పేదవాళ్లైనా దానికి పట్టింపులేదు. నేను కూడా ఈ ఒత్తిడిని అనుభవించా. నా భర్త, వైద్యుల సాయంతో ఆ మహమ్మారి నుంచి బయటపడ్డా. ఏ వయసులోనైనా, ఏ సమయంలోనైనా ఈ వ్యాధి మనల్ని వెంటాడే అవకాశం ఉంది. ఈ రోగానికి తప్పనిసరిగా చికిత్స అవసరం. నిర్లక్ష్యం చేస్తే ప్రాణాల్ని బలిగొంటుంది" అంటూ వెల్లడించారు.
ఇటీవలే 'సీజన్ గ్రీటింగ్స్' వెబ్సిరీస్తో తిరిగి నటనలో అడుగుపెట్టిన సెలీనా.. ఆస్ట్రేలియా పారిశ్రామికవేత్త పీటర్ హాగ్ను వివాహం చేసుకున్నారు.
ఇదీ చూడండి:ఓటీటీలకు క్యూ కట్టిన బాలీవుడ్.. మరి టాలీవుడ్?
