బాలీవుడ్ నటుడు సుశాంత్ మృతి కేసును డ్రగ్స్ కోణంలో విచారిస్తున్న నార్కొటిక్స్ కంట్రోల్ బ్యూరో(ఎన్సీబీ) అధికారుల్లోని ఒకరికి కరోనా పాజిటివ్గా తేలింది. దీంతో బుధవారం విచారణను తొందరగా పూర్తి చేశారు. దర్యాప్తులో భాగంగా సుశాంత్ మాజీ మేనేజర్ శ్రుతి మోదీని కేవలం గంటసేపు మాత్రమే ప్రశ్నించి పంపించేశారు.
"సుశాంత్ కేసును డ్రగ్స్ కోణంలో విచారిస్తున్న మా బృందంలోని ఓ సభ్యునికి కరోనా సోకింది. యాంటిజెన్ పరీక్షలో ఈ విషయం తెలిసింది. మిగిలిన అధికారులకు టెస్టులు చేయిస్తున్నాం. అధికారులు తగిన జాగ్రత్తలు పాటిస్తున్నారు. అందుకోసమే ఈ రోజు విచారణకు హాజరైన శ్రుతి మోదీని తిరిగి పంపించేశాం" -ఎన్సీబీ ప్రకటన
జయ విచారణకు రాకపోవచ్చు
సుశాంత్ మాజీ మేనేజర్ శ్రుతి మోదీతో పాటు టాలెంట్ మేనేజర్ జయ సాహాను ఎన్సీబీ బుధవారం విచారణకు పిలిచింది. ఇప్పటికే విచారణకు శ్రుతి మోదీ హాజరవగా, ప్రస్తుత పరిస్థితుల్లో జయ సాహా రాకపోవచ్చని తెలుస్తోంది.
డ్రగ్స్ కోణంలో దర్యాప్తు చేస్తున్న క్రమంలో నటి రియా చక్రవర్తి వాట్సప్ సందేశాల ఆధారంగా శ్రుతి, జయలను ప్రశ్నించడానికి ఎన్సీబీ సమన్లు జారీ చేసినట్లు తెలుస్తోంది. గతేడాది ముంబయిలోని వాటర్స్టాన్ రిసార్ట్లో సుశాంత్, రియా బస చేసినప్పుడు జయ సాహా వీరిద్దరికీ గంజాయ్ ఆయిల్ అందించినట్లు వార్తలు వచ్చాయి. ఈ కేసులో ఇప్పటికే జయ సాహా, శ్రుతి మోదీలను సీబీఐ పలు సందర్భాల్లో విచారించింది.
