'ఆర్ ఆర్ ఆర్' కోసం అభిమానులు ఎంతో ఆసక్తిగా ఎదురుచూస్తున్నారు. బాహుబలి’ తర్వాత రాజమౌళి తెరకెక్కిస్తున్న చిత్రమిది. అగ్ర కథానాయకులు రామ్‌చరణ్‌, ఎన్టీఆర్‌ తొలిసారి కలిసి నటిస్తున్న సినిమా కావడం వల్ల 'ఆర్ ఆర్ ఆర్'పై భారీ అంచనాలున్నాయి. తాజాగా సినిమా విడుదల తేదీ మారే అవకాశముందని వార్తలు వస్తున్నాయి. ఈ సినిమాను వచ్చే ఏడాది జులైలో తీసుకురావాలని చిత్రబృందం భావించినా... ఇప్పుడున్న పరిస్థితిలో సాధ్యం కాదని సినీ వర్గాల సమాచారం. దీని ప్రకారం 2021 జనవరిలో సంక్రాంతి కానుకగా సినిమా విడుదల కానుందని సమాచారం.
ఇదే కారణమా..?
ఆది నుంచే ఎన్నో అవాంతరాలతోనే కొనసాగుతోంది జక్కన్న ప్రాజెక్టు. ఒకానొక సమయంలో ఇద్దరు హీరోలూ గాయల పాలయ్యారు. ఇందులో నటిస్తోన్న ఆలియా భట్ కూడా అనారోగ్యం పాలైంది. వీరితో పాటు ఇందులో కీలక పాత్ర పోషిస్తున్నాడు బాలీవుడ్ స్టార్ నటుడు అజయ్ దేవగణ్. వీళ్లందరి డేట్లు సరిగా కుదరకపోవడం చిత్రబృందానికి ఇబ్బందిగా తయారైందట. సినిమాలో బాహుబలికి మించి యాక్షన్ సన్నివేశాలనూ తీర్చిదిద్దే ఆలోచన ఉన్నాడట దర్శకధీరుడు. ఇవే ఆలస్యానికి కారణాలుగా తెలుస్తోంది.