కరోనాపై పోరుకు దేశవ్యాప్తంగా సినీ ప్రముఖులు ఎవరి శైలిలో వారు తమ వంతు సాయం చేస్తున్నారు. ఈ క్రమంలోనే ప్రముఖ నటుడు సోనూసూద్ ప్రత్యక్షంగా రంగంలోకి దిగారు. లాక్డౌన్ వేళ ఆయా ప్రాంతాల్లో చిక్కుకున్న వలస కార్మికులను తమ స్వస్థలాలకు చేర్చేందుకు బస్సులు ఏర్పాటు చేశారు. స్వయంగా వివిధ రాష్ట్ర ప్రభుత్వాధికారులతో మాట్లాడి, అనుమతులు పొందిన తర్వాత.. కార్మికుల్ని జాగ్రత్తగా ఇళ్లకి పంపిస్తున్నారు. తాజాగా కార్మికులు సంప్రదించేందుకు వీలుగా టోల్ ఫ్రీ నెంబర్నూ ప్రారంభించారు. తమ సొంతూళ్లకు వెళ్లాలనుకునే వారు 18001213711కు కాల్‌ చేయాలని కోరారు సోనూసూద్.
"నాకు ప్రతిరోజు వేల కొద్ది కాల్స్ వస్తున్నాయి. నా కుటంబం, స్నేహితులు వలస కార్మికుల డేటాను సేకరించి వారిని తమ ఇళ్లకు చేర్చే పనిలో బిజీగా ఉన్నారు. అయినప్పటికీ కొంతమందిని మేము సంప్రదించలేకపోవచ్చు. కాబట్టి టోల్ ఫ్రీ నెంబర్ను ప్రారంభించాలని నిర్ణయించాం. దయచేసి ఎవరైతే ఇంటికి తిరిగి వెళ్లాలని కోరుకుంటున్నారో నాకు తెలియజేయండి. మీరు ఎ‍క్కడ ఉన్నారో, ఎక్కడికి వెళ్లాలి అనుకుంటున్నారో చెప్పండి. నేను, నా బృందం మిమ్మల్ని స్వస్థలాలకు పంపేందుకు శాయశక్తులా ప్రయత్నిస్తాం"
-సోనూసూద్, నటుడు.