పార్వతీశం కథానాయకుడిగా, దర్శకుడు చైతన్య కొండ తెరకెక్కిస్తున్న చిత్రం 'సావిత్రి వైఫ్ ఆఫ్ సత్యమూర్తి'. గోగుల నరేంద్ర నిర్మాత. నటి శ్రీలక్ష్మి హీరో భార్యగా నటిస్తున్నారు. ఈ చిత్రం బుధవారం హైదరాబాద్‌లో పూజా కార్యక్రమాలతో ప్రారంభమైంది. ముహూర్త సన్నివేశానికి ప్రముఖ దర్శక నిర్మాత తమ్మారెడ్డి భరద్వాజ క్లాప్‌ ఇచ్చారు.
"25ఏళ్ల కుర్రాడికి 60ఏళ్ల ఆవిడ భార్య ఎలా అయింది? అనే ఆసక్తికర కథాంశంతో ఈ చిత్రం రూపొందిస్తున్నాం. కుటుంబ సమేతంగా చూసి, హాయిగా నవ్వుకోవచ్చు. ఈ కథకు పార్వతీశం అయితేనే బాగుంటాడనిపించి ఈ సినిమాకి తీసుకున్నాం. అతని కుమారులుగా శివారెడ్డి, సునీల్‌ శెట్టి కనిపిస్తారు" అని దర్శకుడు చైతన్య చెప్పారు.