చిరంజీవి 'సైరా' చిత్రానికి ఎడిటింగ్​ సమస్య!

మెగాస్టార్​ చిరంజీవి నటించిన సైరా చిత్రం ప్రస్తుతం ఎడిటింగ్ జరుపుకుంటోంది. నిడివి ఎక్కువ ఉన్న కారణంగా దర్శకుడు సురేందర్ రెడ్డి మల్లగుల్లాలు పడుతున్నాడంట. అనవసర సీన్లు తొలగించేందుకు మెగాస్టారే రంగంలోకి దిగినట్టు సమాచారం.

మెగాస్టార్ చిరంజీవి నటిస్తున్న సైరా చిత్రం ఇటీవల షూటింగ్ పూర్తి చేసుకున్న విషయం తెలిసిందే. ప్రస్తుతం ఎడిటింగ్ జరపుకుంటున్న ఈ సినిమా నిడివి ఎక్కువ ఉందంట. ఎంత కత్తిరిస్తున్నా 3 గంటల 30 నిముషాలకు ఏ మాత్రం తగ్గట్లేదంట. ఈ విషయంపై దర్శకుడు సురేందర్​ రెడ్డి మల్లగుల్లాలు పడుతున్నట్టు సమాచారం.

ఇందుకోసం స్వయంగా చిరంజీవే రంగంలోకి దిగాడంట. ఆయన ప్రస్తుతం సినిమాను పదే పదే వీక్షిస్తూ.. అనవసరమనుకున్న సీన్లను కట్‌ చేసే పనిలో బిజీగా ఉన్నాడంట. ఏదేమైనా చివరగా.. రన్‌టైమ్​ను 3 గంటల లోపే ఉండేలా నిర్దేశించుకున్నట్టు సమాచారం. ఇప్పుడీ పని పూర్తయితే గానీ, గ్రాఫిక్స్​ పనులు మొదలు పెట్టడం కుదరదు. అక్టోబరు 2కు రెండు నెలలే ఉన్న నేపథ్యంలో అనుకున్న సమయానికి చిత్రం విడుదలవుతుందా లేదా అనేది వేచి చూడాలి.

ఒకప్పుడు 3 గంటల నిడివి గల సినిమాలను ఆదరించారు. ప్రస్తుతం తక్కువ సమయంలోనే చిత్రాన్ని వీక్షించేందుకు సగటు ప్రేక్షకుడు ఇష్టపడుతున్నాడు. అయితే రంగస్థలం, అర్జున్ రెడ్డి లాంటి చిత్రాలు కథ, కథనాలుతో 3 గంటల నిడివి ఉన్నా.. సినీ ప్రియులకు విసుగు తెప్పించలేదు. ఇదే ఫార్ములానూ సైరాలోనూ వాడనున్నట్టు సమాచారం.

ఇది సమాచారం: సమంత ఫ్లయిట్ మిస్... లైఫ్​ సూపర్​ హిట్​!