విజయ్-సుకుమార్ సినిమాపై వదంతులు

సుకుమార్-విజయ్ దేవరకొండ సినిమాపై వస్తున్న ఊహాగానాలను కొట్టిపారేసింది నిర్మాణ సంస్థ. వారి ప్రస్తుత ప్రాజెక్టులు పూర్తయ్యాక, అది సెట్స్​పైకి వెళ్తుందని తెలిపింది.

కొన్ని కొత్త సినిమాలకు సంబంధించి ఇటీవల అనూహ్యమైన మార్పులు చోటు చేసుకున్నాయి. ఒక హీరోతో సినిమా చేయాల్సిన దర్శకుడు, మరో హీరో కోసం రంగంలోకి దిగాలని నిర్ణయించారు. ఈమధ్యే రెండు మూడు ప్రాజెక్టుల విషయంలో అలాంటి మార్పులు జరిగాయి.

దీంతో సుకుమార్‌ - విజయ్‌ దేవరకొండ కాంబోలోని సినిమా విషయంలోనూ అలాంటి ప్రచారమే సాగింది. కానీ చిత్రాన్ని నిర్మిస్తున్న ఫాల్కన్‌ క్రియేషన్స్‌ సంస్థ ఆ ప్రచారాన్ని తోసిపుచ్చింది. విజయ్‌ - సుకుమార్‌ ఒప్పందాలు పూర్తయ్యాక, ప్రణాళిక ప్రకారమే ఈ సినిమా ప్రారంభమవుతుందని, అందులో ఎలాంటి మార్పు లేదని సదరు సంస్థ ప్రకటించింది.