తలైవా రజనీకాంత్ ఖాతాలో మరో రూ.200 కోట్ల సినిమా చేరింది. అతడు పోలీసు అధికారిగా నటించిన సినిమా 'దర్బార్'. ఎ.ఆర్‌. మురుగదాస్‌ దర్శకుడు. నయనతార, నివేదా థామస్‌, సునీల్‌ శెట్టి, యోగిబాబు తదితరులు కీలక పాత్రలు పోషించారు.
11 రోజుల్లోనే...
ప్రపంచవ్యాప్తంగా జనవరి 9న ప్రేక్షకుల ముందుకు వచ్చిన ఈ సినిమా మంచి టాక్‌ అందుకుంది. అంతేకాకుండా బాక్సాఫీసు వద్ద విశేషమైన వసూళ్లు రాబడుతోంది. ఈ చిత్రం రూ.200 కోట్ల క్లబ్‌లోకి చేరిందని విశ్లేషకులు పేర్కొన్నారు. విడుదలైన 11 రోజుల్లోనే ఈ ఘనత సాధించడం విశేషం.
తమిళనాడులో దాదాపు రూ.80 కోట్లు, కేరళలో రూ.8 కోట్లు, కర్ణాటకలో రూ.19 కోట్లు, తెలుగు రాష్ట్రాల్లో దాదాపు రూ.20 కోట్లు, హిందీ వెర్షన్‌లో రూ.8 కోట్లు సాధించిందని చెప్పారు. విదేశాల్లో దాదాపు రూ.70 కోట్లు రాబట్టిందని తెలిపారు.
కెరీర్లో అయిదో సినిమా
ఇప్పటి వరకు రజనీ సినీ కెరీర్లో నాలుగు సినిమాలు రూ.200 కోట్ల క్లబ్‌లో చేరాయి. ఇది అయిదో చిత్రంగా రికార్డు సృష్టించింది. గతంలో 'రోబో', 'కబాలి', '2.ఓ', 'పేట' సినిమాలు ఈ ఘనతను అందుకున్నాయి.
రజనీ-మురుగదాస్‌ కాంబినేషన్లో మరో సినిమా రానుందని తెలుస్తోంది. అయితే దీనిపై అధికారిక ప్రకటన రాలేదు. తలైవా ప్రస్తుతం శివ దర్శకత్వంలో నటిస్తున్నాడు. కీర్తి సురేష్‌, ఖుష్బూ, మీనా ప్రధాన పాత్రల్లో కనిపించనున్నారు.