సంగీత సామ్రాజ్యాన్ని పాలించి.. లాలించి.. శాసించిన దిగ్గజం రాజన్ మరణం సోమవారం సినీప్రియులను వేదనకు గురిచేసింది. బెంగళూరులోనే ఆయన తన చివరిరోజులను గడిపినా.. దక్షిణభారత సినీసామ్రాజ్యాన్ని పాలించిన ఘనత మూటగట్టుకున్నారు. 'ఎన్నెన్నో జన్మల బంధం నీదీ నాదీ. ఎన్నటికీ మాయని మమత నీదీ నాదీ' అంటూ పూజ సినిమాలో జన్మజన్మల బంధం, అనుబంధం గురించి వివరించినా, 'మేఘమా దేహమా మెరవకే ఈ క్షణం మెరిసినా కురిసినా కరుగు నీ జీవనం'.. అంటూ విరహ గీతం పాడినా, 'నాగమల్లివో తీగమల్లివో' అంటూ ప్రేయసిని పొగడ్తలతో ముంచెత్తినా, 'ఏమో ఏమో ఇది నాకేమో అయినది.. ఈ వేళలో నా గుండెలో' అంటూ ప్రియుడితో యుగళగీతం పాడినా.. వాటికి స్వరాల్ని సమకూర్చిన రాజన్- నాగేంద్ర ద్వయానికే చెల్లింది. ఆ ఇద్దరిలో స్వరాగ్రజుడు రాజన్ కన్నుమూశారన్న వార్త కన్నడనాడును సోమవారం దిగ్భ్రాంతికి గురిచేసింది. దాదాపు నాలుగు దశాబ్దాల పాటు ఇటు తెలుగు, అటు కన్నడ, హిందీ, మలయాళం, తమిళం, సింహళీయ భాషల్లో సినీ సంగీతానికి ఆ ఇద్దరూ చెరగని ముద్రవేశారు.
సినిమాకు రాజన్- నాగేంద్ర సంగీతం ఉండాల్సిందేనని అప్పట్లో అనేకమంది నిర్మాతలు పట్టుపట్టేవారట. వీరిద్దరి పాత్రలేకుంటే సినిమాలు విజయతీరం వైపు పయనించడం సాధ్యంకాదని వారి భావన. ఇక చందనసీమ విషయానికొస్తే కన్నడ కంఠీరవుడు డాక్టర్‌ రాజ్‌కుమార్‌, సాహస సింహ విష్ణువర్ధన్‌ల సినిమాల్లో వీరి పాటలు తప్పనిసరి అనే కాలం కొనసాగిందని చెబుతారు. 'నా నిన్న మరెయలారె.. ఎందెందూ నిన్నన్ను బిడలారె', 'సిహిముత్తు సిహిముత్తు ఇన్నొందు'.. ఇలాంటి పాటలు దశాబ్దాలు గడుస్తున్నా ప్రేక్షకుల హృదయాల్లో చెరగని ముద్ర వేశాయి. ఇప్పటికి కూడా ఏ కార్యక్రమం జరిగినా రాజన్-నాగేంద్ర సంగీతం సమకూర్చిన పాటలే వినవస్తుంటాయి. ఇందుకు రాజన్ ఒకానొక సందర్భంలో కారణం కూడా చెప్పారు. సంగీతమంటే ఆషామాషీ వ్యవహారం కాదని- నిరంతర శ్రమ ద్వారానే కొత్తదనాన్ని ప్రేక్షకులకు అందించవచ్చని వివరించారు. అందుకేనేమో.. ఏమాత్రం తీరిక దొరికినా ఆయన ఓ రుషిలా దీర్ఘాలోచనలో గడిపేవారని రాజన్ గురించి తెలిసినవారు గుర్తుచేసుకుంటారు.