జయాపజయాలతో సంబంధం లేకుండా వరుసగా కొత్త సినిమాలకు సంతకాలు చేసేస్తున్నాడు నితిన్. ప్రస్తుతం ఆయన చేతిలో 'భీష్మ'తో పాటు 'రంగ్‌దే' చిత్రాలు ఉన్నాయి. ఈ రెండూ శరవేగంగా చిత్రీకరణ జరుపుకొంటున్నాయి. ఓవైపు ఇవి సెట్స్‌పై ఉండగానే ముచ్చటగా మరో ప్రాజెక్టుకూ గ్రీన్‌ సిగ్నల్‌ ఇచ్చేశాడట నితిన్.
గతేడాది బాలీవుడ్‌లో బ్లాక్‌బస్టర్‌ హిట్‌గా నిలిచిన 'అంధాధున్' చిత్ర తెలుగు రీమేక్లో నితిన్ కథానాయకుడిగా నటించబోతున్నాడట. తాజాగా ఈ సినిమా రీమేక్ హక్కులను నితిన్ తండ్రి సుధాకర్‌ రెడ్డి దక్కించుకున్నట్లు సినీ వర్గాల నుంచి సమాచారం అందుతోంది. ఓ సరికొత్త క్రైమ్‌ థ్రిల్లర్‌ నేపథ్యంలో సాగే ఈ కథలో కథానాయకుడు ఓ అంధుడిగా కనిపిస్తాడు. ఈ పాత్రను మాతృకలో ఆయుష్మాన్‌ ఖురానా చేయగా.. ఇప్పుడు నితిన్‌కు ఆ అవకాశమొచ్చింది.