సినిమా విడుదలంటే సవాలక్ష లెక్కలుంటాయి. మామూలు రోజుల్లో సినిమా విడుదల చేయడానికీ పండగ వేళ ప్రేక్షకుల ముందుకు తేవడానికి చాలా తేడా ఉంటుంది. అందుకే మన దర్శకనిర్మాతలు పర్వదినాల్లో సినిమాల్ని ప్రదర్శించడానికి ఆసక్తిగా సిద్ధమవుతుంటారు. ఈ ఏడాది దసరా, దీపావళి సందడి ముగిసింది. దీపావళికి బాక్సాఫీసు ముందుకొచ్చిన బాలీవుడ్‌ చిత్రం 'సూర్యవంశీ' బాక్సాఫీసు వద్ద హిట్‌గా నిలిచింది. కరోనా దెబ్బకు నష్టాల ఊబిలో కూరుకుపోయిన థియేటర్లకు పాత వైభవాన్ని తీసుకొచ్చాయి ఈ చిత్ర వసూళ్లు. ఏడాది చివర్లో వచ్చే పండగ క్రిస్మస్. గత ఏడాది కరోనా కారణంగా క్రిస్మస్‌కు థియేటర్లలో సందడి లేదు. ఈ ఏడాది భారీ బాలీవుడ్‌ చిత్రం థియేటర్లకు రానుంది. ఆ సందడిని కొనసాగిస్తూ ఏడాది చివర్లో మరో చిత్రం సిద్ధమవుతోంది. తెలుగులోనూ రెండు క్రేజీ సినిమాలు విడుదలవుతున్నాయి.
గత ఏడాది క్రిస్మస్‌కు ఓటీటీలోనే వినోదాల్ని ఆస్వాదించవలసి వచ్చింది ప్రేక్షకులు. వరుణ్‌ధావన్‌ 'కూలీ నెం.1' చిత్రంతో పాటు మరిన్ని ఓటీటీలో సందడి చేశాయి. 2019లో అక్షయ్‌కుమార్‌ నటించిన 'గుడ్‌న్యూస్‌' క్రిస్మస్ కానుకగా వచ్చి భారీ విజయాన్ని అందుకుంది. ఈసారి క్రిస్మస్‌కు డిసెంబరు 24న ప్రేక్షకుల్ని అలరించడానికి సిద్ధమవుతోంది '83'. ఆ తర్వాత 31న 'జెర్సి' రానుంది. విశేషం ఏంటంటే రెండు చిత్రాలు క్రికెట్‌ నేపథ్యంతో కూడినవే. కానీ ఈ ఏడాది క్రిస్మస్ బరిలోకి వద్దాం అనుకున్న ఆమిర్‌ఖాన్‌ చిత్రం 'లాల్‌ సింగ్ ఛద్దా' వచ్చే ఏడాదికి వెళ్లిపోయింది.
వరుణ్.. నాని హంగామా..
తెలుగులో క్రిస్మస్ వేళ రెండు చిత్రాలు అలరించనున్నాయి. డిసెంబరు 24న 'గని', 'శ్యామ్ సింగరాయ్' చిత్రాలు రానున్నాయి. గద్దలకొండ గణేష్‌ తర్వాత వరుణ్‌తేజ్‌ నుంచి వస్తోన్న చిత్రం 'గని'. బాక్సింగ్‌ నేపథ్యంలో సాగే ఈ సినిమా టీజర్‌ ఆకట్టుకుంటోంది. కిరణ్‌ కొర్రపాటి దర్శకత్వం వహించిన ఈ చిత్రంలో సయీమంజ్రేకర్‌ కథా నాయిక. నాని ఎన్నో ఆశలు పెట్టుకున్న చిత్రం 'శ్యామ్‌సింగరాయ్‌' సాయిపల్లవి కథానాయికగా నటిస్తోన్న ఈ చిత్రంలో నాని ద్విపాత్రాభినయం చేస్తున్నారు. బంగాల్‌ నేపథ్యం ఉన్న ఈ సినిమా ట్రైలర్‌ విడుదలై ఆకట్టుకుంటోంది. 'టాక్సీవాలా'తో విజయం అందుకున్న రాహుల్‌ సంకృత్యాన్‌ ఈ చిత్రానికి దర్శకత్వం వహించారు. దీపావళితో మొదలైన బాక్సాఫీసు మెరుపులు క్రిస్మస్‌కు రెట్టింపు అవుతాయనే నమ్మకంతో అటు బాలీవుడ్‌, ఇటు టాలీవుడ్‌లు ఎంతో ధీమాగా ఉన్నాయి. అన్నీ అనుకున్నట్టు జరిగితే థియేటర్లకు పాత వైభవం తిరిగి రావడం మొదలైనట్టే.