కరోనా లాక్డౌన్ కారణంగా బాగా నష్టపోయిన రంగాల్లో చిత్రపరిశ్రమ ఒకటి. అన్లాక్లో భాగంగా షాపింగ్ మాల్స్, విమాన సర్వీసులు, రైల్వేలు, బస్సులు, మెట్రో, హోటళ్లు, జిమ్లు ఇలా చాలా రంగాలకు కేంద్ర ప్రభుత్వం అనుమతి ఇచ్చింది. థియేటర్లు తెరుచుకోవడానికి ఇంకా అనుమతి ఇవ్వలేదు. ఈ నేపథ్యంలోనే థియేటర్లను త్వరగా తెరిచేలా చూడాలంటూ దేశంలోని అన్ని సినీ పరిశ్రమల నుంచి వినతులు వస్తున్నాయి.
రూ.వేల కోట్ల నష్టం
'అన్లాక్ సినిమాస్.. సేవ్ జాబ్స్' పేరుతో ఇన్స్టాలో మొదలైన హ్యాష్ట్యాగ్కు పలువురు సినీ ప్రముఖుల నుంచి మద్దతు లభిస్తోంది. ఈ ఆరు నెలల లాక్డౌన్తో భారతీయ చిత్ర పరిశ్రమకు నెలకు సుమారు రూ.1500 కోట్ల చొప్పున రూ.9000 కోట్లు నష్టపోయినట్లు ఇందులో ప్రస్తావించారు.
"దేశవ్యాప్తంగా పదివేల స్క్రీన్లు మూసేయడం వల్ల ప్రత్యక్షంగా రెండు లక్షల మంది, పరోక్షంగా ఎన్నో లక్షల మంది ఉపాధి కోల్పోయారు. ప్రస్తుతం సినీ ఇండస్ట్రీ పరిస్థితి చాలా దయనీయంగా ఉంది. అన్ని రకాల జాగ్రత్తలు తీసుకుని థియేటర్లను తెరిస్తే చాలా మంచిది. ఇప్పటికే చైనా, కొరియా, యూకే, ఇటలీ, యూఏఈ, యూఎస్ఏ, సింగపూర్, మలేసియా, శ్రీలంక తదితర దేశాల్లో జాగ్రత్తలు తీసుకుని థియేటర్లను తెరిచారు. అక్కడ వాటికి ప్రేక్షకుల నుంచి మంచి స్పందన లభిస్తోంది. కరోనా ప్రభావం తీవ్రంగా ఉండటం, థియేటర్లు తెరుచుకోవడం వల్ల సినిమా రంగంపై ఆధారపడిన చాలామంది జీవితాలు రోడ్డున పడ్డాయి. అందుకే ప్రభుత్వం త్వరగా థియేటర్లను తెరిచేందుకు అనుమతులు ఇవ్వాలని కోరుకుంటున్నాం" అని హ్యాష్ట్యాగ్లో రాశారు.
నమ్రత మద్దతు
దీనిపై ప్రముఖ కథానాయకుడు మహేశ్ బాబు సతీమణి నమ్రత స్పందించారు. "థియేటర్లను త్వరగా తెరవాలంటూ కేంద్ర ప్రభుత్వానికి విన్నవించుకుంటున్నాం. సినిమాపై ఆధారపడిన వారి ఉద్యోగాలు, ఉపాధికి సంబంధించిన విషయమిది" అని నమ్రత ఏఎమ్బీ సినిమాస్ పెట్టిన పోస్ట్ను రీపోస్ట్ చేస్తూ ఇలా రాసుకొచ్చారు.
