Mohan babu son of india news: "జయాపజయాల్ని నేనెప్పుడూ పట్టించుకోను. సినిమా హిట్టయితే గొప్ప.. ప్లాపైతే అసమర్థత అనుకోకూడదు. మన ప్రయత్నంలో ఏమైనా లోపముందా? అని ఆలోచించుకోగలగాలి. ఆ తప్పులు పునరావృతం కాకుండా చూసుకోగలగాలి" నటుడు మోహన్బాబు అన్నారు. ప్రతినాయకుడిగా, కథానాయకుడిగా ఎన్నో వైవిధ్య మైన పాత్రలతో సినీ ప్రియుల్ని మెప్పించిన నటుడాయన. ఇప్పుడాయన 'సన్ ఆఫ్ ఇండియా'గా అలరించేందుకు సిద్ధమయ్యారు. ఇందులో ఆయన హీరోగా నటించడమే కాక.. స్వయంగా స్క్రీన్‌ప్లే అందించడం మరో విశేషం. డైమండ్‌ రత్నబాబు తెరకెక్కించారు. మంచు విష్ణు నిర్మించారు. ఈ సినిమా ఈనెల 18న ప్రేక్షకుల ముందుకు రానుంది. ఈ నేపథ్యంలోనే ఆదివారం హైదరాబాద్‌లో విలేకర్లతో ముచ్చటించారు మోహన్బాబు. ఈ సందర్భంగా ఆయన పంచుకున్న విశేషాలివి..
సందేశం.. వినోదాల మేళవింపుతో..
యువతరంతో పాటు అన్ని వర్గాల ప్రేక్షకులు చూడదగ్గ సందేశాత్మక చిత్రమిది. ఇందులో నా పాత్ర చాలా శక్తిమంతంగా.. సరికొత్తగా ఉంటుంది. ‘చెడు వినకు.. చెడు చూడకు.. చెడు మాట్లాడకు’ అనే సిద్ధాంతాలకు తగ్గట్లుగా జీవనం సాగించే హీరో.. ఒక ఎమ్మెల్యే వల్ల చేయని తప్పునకు జైలుకు వెళ్లాల్సి వస్తుంది. ఈ క్రమంలోనే తన కుటుంబాన్ని పోగొట్టుకుంటాడు. మరి జైలుకెళ్లిన హీరో ఆ తర్వాత ఏం చేశాడు? అవినీతి వ్యవస్థపై ఎలాంటి పోరాటం చేశాడు? అన్నది చిత్ర కథాంశం. ఇందులో సందేశంతో పాటు చక్కటి ఎంటర్‌టైన్‌మెంటూ ఉంది’’.
* మళ్లీ క్రియాశీల రాజకీయాల్లోకి రావాలన్న ఆలోచన అస్సలు లేదు. ఈ జన్మకు వద్దనుకున్నా. చంద్రబాబు బంధువు. అప్పుడు అన్నగారితో సినిమా చేశాం. ప్రచారానికి పంపించారు. వెళ్లాం. ఇప్పుడు జగన్‌ బంధువు. చంద్రబాబుకు చేసినట్టు ఇక్కడా చేయాలి కదా. ప్రచారం చేశాం. అయిపోయింది. ఇప్పుడు సినిమాలు, యూనివర్సిటీ.. అని బోలెడు పనులున్నాయి.
ఓటీటీకి అనుకున్నాం..
రత్నబాబు కథ చెప్పినప్పుడే సినిమా కచ్చితంగా చేయాలనిపించింది. నిజానికి ఇందులో కొంత రిస్క్‌ ఉన్నా.. సాహసం చేయకపోతే ఎలా? అన్న ఉద్దేశంతో ముందడుగేశాం. వాస్తవానికి మేము దీన్ని ఓటీటీ కోసం అనుకున్నాం. దీని నిడివి గంటన్నరే. అందుకే కాస్త కుర్రకారు కోరుకునే అంశాల్ని జోడించాం. సినిమాని థియేటర్‌లోకి తీసుకురావాలనుకున్నాక.. కొన్ని సన్నివేశాలు తీసేశాం. మళ్లీ ఓటీటీలో విడుదల చేసేటప్పుడు వాటిని జోడించే అవకాశముంది. ఈ చిత్రంలో వినిపించిన 11వ శతాబ్దాం నాటి రఘువీర గద్యం ప్రత్యేక ఆకర్షణగా నిలుస్తుంది. కోటి రూపాయలకు పైగా ఖర్చు చేసి ఆ పాటను ప్రత్యేకంగా రూపొందించాం. ఈ గీతాన్ని పాడించడం కోసం తొలుత నలుగురైదుగురు గాయకుల్ని ప్రయత్నించాం. కానీ, ఈ పాటకు వాళ్లు సెట్‌ కాలేదు. తర్వాత నేను, ఇళయరాజా బాగా ఆలోచించి.. మలయాళ గాయకుడు రాహుల్‌ నంబియార్‌తో ఆ గద్యాన్ని పాడించాం.