బుల్లి తెరపై మార్లిన్ మన్రో జీవితకథ

హాలీవుడ్ సినీ అభిమానుల కలల సుందరి మార్లిన్ మన్రో జీవితంపై టీవీ సిరీస్ రాబోతుంది. బీబీసీ స్టూడియోస్ నిర్మిస్తోంది. మార్లిన్ చివరి రోజుల్లో ఆనాటి అమెరికా అధ్యక్షుడు జాన్ ఎఫ్ కెనడితో అనుబంధం లాంటి అంశాలను ఈ టీవీ సిరీస్​లో ప్రస్తావించనున్నారు.

మార్లిన్ మన్రో.. 50వ దశకంలో హాలీవుడ్​ మొత్తాన్ని తన వైపు తిప్పుకున్న సుందరి. ప్రపంచవ్యాప్తంగా అభిమానులున్న మార్లిన్ మూడు పదుల వయసులోనే మరణించింది. ఇప్పుడు ఈమె జీవితం టీవీ సిరీస్​గా రాబోతుంది. ప్రస్తుతానికి 'ద లాస్ట్ డేస్ ఆఫ్ మార్లిన్ మన్రో' అనే వర్కింగ్ టైటిల్​తో బీబీసీ స్టూడియోస్ నిర్మిస్తోంది.

మార్లిన్ మాన్రో

ప్రముఖ రచయిత కీత్ బ్యాడ్​మాన్ పుస్తకం 'ఫైనల్​ ఇయర్స్ ఆఫ్ మార్లిన్ మన్రో: ద షాకింగ్ ట్రూ స్టోరీ' ఆధారంగా ఈ సిరీస్ తీస్తున్నారు. హాలీవుడ్ స్టూడియోస్​తో ఆమెకున్న అనుబంధం, మార్లిన్ చివరి రోజుల్లో ఆనాటి అమెరికా అధ్యక్షుడు జాన్ ఎఫ్ కెనడి, రాబర్ట్ కెనడీలతో సంబంధం లాంటి అంశాలను ఈ టీవీ సిరీస్​లో ప్రస్తావించనున్నారు.

మార్లిన్ మాన్రో

1962లో మార్లిన్ ఆత్మహత్య చేసుకుని చనిపోయినట్లు పోలీసులు నిర్ధరించారు. కానీ ఇప్పటికీ ఆమె మృతిపై పలు అనుమానాలున్నాయి. ఆమె మరణించిన ముందురోజు రాత్రి ఏం జరిగిందో ఇందులో చూపించనుంది చిత్రబృందం.

హాలీవుడ్ ఫేమస్ ఐకాన్​గా గుర్తింపు తెచ్చుకున్న మార్లిన్​ జీవితంపై ఇప్పటికే కొన్ని టీవీ సిరీస్​లు వచ్చాయి. 2011లో 'మై వీక్ విత్ మార్లిన్'​, 2015లో 'ద సీక్రెట్ లైఫ్ ఆఫ్ మార్లిన్ మన్రో' లాంటి డ్రామా సిరీస్​లు ప్రేక్షకులను అలరించాయి.